समाचारहरू

सिमकोट गाउँपालिका–८ मा रहेको खोल्सी गाउँमा धान रोप्न सुरु भएसँगै कान्ति आधारभुत विद्यालयका विद्यार्थीहरु पठनपाठनबाट प्रभावित बनेका छन् ।

खोल्सी गाउँमा जेठ ९ गतेदेखि धान रोपाई सुरु भएसँगै कक्षा ६, ७ र ८ को पठनपाठन प्रभावित बनेको छ ।

खोल्सी गाउँको रुढिवादी संस्कारले गर्दा विवाहित महिलाले धान रोप्न नहुने भन्दै अविवाहित केटीले मात्र धान रोप्न पर्ने चलन रहेको हुँदा कक्षा ६ देखि ८ सम्मको पठनपाठन एक हप्तादेखि प्रभावित बनेको शिक्षक बमबहादुर थापाले बताए ।

विवाहित महिलाले धान रोपेमा असर पार्ने, उब्जनी राम्रो नहुने, खेतमै धान सुक्ने जस्ता अन्धविश्वास रहेका कारण बालिका छात्रा विद्यालयमा उपस्थित नहुँदा अन्य विद्यार्थी समेतको पठनपाठनमा समस्या भएको शिक्षक थापाले बताए ।

कक्षा ६, ७ र ८ का छात्रा सात दिनदेखि धान रोपाईमा व्यस्त हुँदा सोही कक्षाका अन्य छात्रको पठनपाठनसमेत प्रभावित भएको हो ।

छात्रलाई मात्र पठनपाठन गर्दा रोपाईमा गएका छात्राहरुको कोर्ष छुट्ने भएकाले पढाउन समस्या भएको शिक्षक विरबहादुर शाहीले बताए ।

किशोरी छात्रा धान रोप्न गएको दिनदेखि कक्षा ६ देखि ८ सम्मको विषयगत कोर्ष अगाडि बढाउन समस्या भएको उनले बताए ।

खोल्सी गाउँको अविवाहित छोरीले मात्र धान रोप्ने संस्कारले गर्दा विद्यालयको पढाई प्रभावित बनेको छ । कक्षा ६, ७ र ८ मा २७ जना बालिका रहेको शिक्षक शाहीले बताए ।

छात्रा विद्यालयमा किन अनुपस्थित भनेर बुझ्दा हाम्रो परम्परा नै अविवाहित छोरीले धान रोप्ने चलन रहेको हुनाले रोपाई सम्पन्न नहुँदासम्म विद्यालयमा नपठाउने अभिभावक जनके शाहीले बताए ।

अहिले कान्ती आधारभुत विद्यालयमा बालशिक्षा देखि कक्षा ८ सम्ममा छात्र, छात्रा गरी १ सय ७० जना विद्यार्थी रहेका शिक्षक थापाले बताए ।

नन्द सिंह