पाल्पामा नवजात शिशुको मृत्युदर घटेन

  ०७३ कात्तिक २२ गते

गर्भवती आमा र नवजात शिशुको जीवन सुरक्षाका लागि स्वास्थ्यसम्बन्धी विभिन्न कार्यक्रम सञ्चालन भएपनि पाल्पामा नवजात शिशुको मृत्युदर भने घट्न सकेको छैन ।

आर्थिक वर्ष २०७२/०७३ को अवधिमा पाल्पामा २८ नवजात शिशुको मृत्यु भएको थियो । जिल्ला स्वास्थ्य कार्यालय पाल्पाका सूचना अधिकृत माधव ज्ञवालीका अनुसार आर्थिक वर्ष २०७२/०७३ को अवधिमा जन्मेको २८ दिनभित्र १४, सात दिनभित्र ६ र महिना नपुगी जन्मेका ८ शिशुको मृत्यु भएको थियो ।

आर्थिक वर्ष २०७१/०७२ मा जन्मेको २८ दिनभित्र दुई र सात दिनभित्र दुई शिशु गरी चार शिशुको मृत्यु भएको थियो । पछिल्लो आर्थिक वर्षमा यो सङ्ख्या बढेर २८ मा पुगेको ज्ञवालीले बताए । अघिल्ला वर्षहरूमा शिशु मृत्युदर प्रति वर्ष १० भन्दा कम रहेको उनले बताए ।

सुत्केरी गराउन स्वास्थ्य संस्थामा नलैजाने र शिशु बिरामी भएमा घरेलु उपचार गराउने गर्दा यो दर बढेको ज्ञवालीले बताए ।


यज्ञमूर्ति तिमिल्सिना