पाँचथरका चार ओटा मतदान केन्द्र अति सम्वेदनशील

  ०७६ मङ्सिर ४ गते

मङ्सिर १४ गते हुने उपनिर्वाचनका लागि सुरक्षाका दृष्टिकोणले पाँचथरका चार ओटा मतदान केन्द्र अति सम्वेदनशील रहेको जिल्ला सुरक्षा समितिले विश्लेषण गरेको छ ।

जम्मा ३१ मतदान केन्द्रमध्ये दुई स्थलका चार ओटा मतदान केन्द्र अति सम्वेदनशील रहेको प्रमुख जिल्ला अधिकारी मुरारी वस्तीले बताए ।

वस्तीले २३ ओटा मतदान केन्द्र सम्वेदनशील र चार ओटा सामान्य रहेको बताए । निर्वाचनलाई निश्पक्ष र भयरहित रूपमा सम्पन्न गर्न नेपाली सेना, शसस्त्र प्रहरी र नेपाल प्रहरी परिचालन गरिने प्रमुख जिल्ला अधिकारी वस्तीले बताए ।

सुरक्षा सम्वेदनशीलताका आधारमा निर्वाचन पूर्व, निर्वाचन र निर्वाचन पश्चातको सुरक्षा व्यवस्था मिलाउने तयारी पूरा गरिएको उनले बताए ।

पाँचथरमा फाल्गुनन्द गाउँपालिकाको अध्यक्ष, फिदिम नगरपालिका–१ को वडाध्यक्ष र हिलिहाङ गाउँपालिका–७ को वडाध्यक्ष गरी तीन पदमा उपनिर्वाचन हुँदैछ ।

यसका लागि फाल्गुनन्द गाउँपालिकामा आठ जना, फिदिम नपा–१ का लागि सात र हिलिहाङ गाउँपालिका–७ का लागि ६ गरी जम्मा २१ जनाले उम्मेदवारी दर्ता गराएका छन् ।

फाल्गुनन्द गाउँपालिकामा १६ हजार ५ सय ७७ जना मतदाता रहेको जिल्ला निर्वाचन कार्यालयका निमित्त निर्वाचन अधिकारी सरोज मेहेताले बताए ।

सो गाउँपालिकामा २३ मतदान केन्द्र रहेको मेहेताले जानकारी दिए । फिदिम नपा–१ मा ३ हजार ६ सय ७६ जना मतदाता रहेको निर्वाचन कार्यालयले जनाएको छ । यस वडामा एक स्थलको तीन मतदान केन्द्र रहेका छन् ।

यसैगरी, हिलिहाङ गाउँपालिका–७ मा २ हजार ६ सय जना मतदाता रहेको निमित्त निर्वाचन अधिकारी मेहेताले बताए । यस वडामा तीन स्थलमा चार ओटा मतदान केन्द्र रहेका छन् ।


मङ्गल बेघा