पश्चिम क्षेत्रमा आज पनि विरोध प्रदर्शन, आन्दोलन कडा पारिने आन्दोलनकारीको भनाइ

  ०७३ मङ्सिर १९ गते

संसद् सचिवालयमा मङ्सिर १४ गते दर्ता गरिएको संविधान संशोधनको विषयलाई लिएर पश्चिम नेपालका केही जिल्लाहरूमा बन्द आह्वान गरिएपछि मङ्सिर १९ गते पाचौँ दिनपनि आन्दोलनका कारण जनजीवन प्रभावित भएको छ ।

इन्सेक रुपन्देही जिल्ला प्रतिनिधि रिमा विसीका अनुसार सरकारले राष्ट्रिय हित विपरित संविधान संशोधन गर्न लागेको आरोपमा नेकपा एमाले, जनमोर्चा नेपाल, नेकपा मार्क्सवादी, अखण्ड नेपाल, राष्ट्रिय जनमोर्चा, नेकपा माले र नेकपा संयुक्तलगायतका दलहरूले आज पाँचौ दिन पनि बिहानैदेखि बुटवलका विभिन्न चोकहरूमा प्रदर्शन गरेका थिए ।

photo20161204rupandehi

बन्दकर्ताले भैरहवा आनन्दवन, खैरेनी, सौ.फर्साटिकर, सालझण्डी, सैनामैनालगायतका स्थानहरूमा पनि प्रदर्शन गरेका थिए ।

photo20161204rupandehi1

बन्दका कारण आइतवार पनि यस क्षेत्रको जनजीवन कष्टकर बनेको छ । बन्दका कारण लामो तथा छोटा दुरीका सवारी साधनहरू, बजार, उद्योग धन्दा, कलकारखाना, शैक्षिक संस्थाहरू र औषधि पसलहरू आज पनि खुलेनन् ।

बन्दकर्ताले कुटनीतिक नियोगका गाडी, एम्बुलेन्स, विवाह, सञ्चार, मानव अधिकारकर्मी लगायत अत्यावश्यक क्षेत्रका गाडीहरूलाई भने निर्वाध सञ्चालन गर्न दिएको छन् ।

photo20161204rupandehi2

आज पनि केही समय प्रहरी र आन्दोलनकारीबिच केही समय सामान्य धकेलाधकेल भएको प्रहरीले जनायो ।

बुटवलको दिपनगरमा लु १ च ७२७६ नम्बरको बोलेरो गाडी र सिद्धेश्वरी उच्च मावि अगाडि पार्किङ गरेर राखेको जीपको सिसा फुटाएको इलाका प्रहरी कार्यालय बुटवलका डिएसपी मुकुन्द मरासिनीले बताए ।

प्रहरीले आज पनि पाँच जना प्रदर्शनकारीलाई गिरफ्तार गरेको जनाएको छ । आर्दशनगरबाट दुई जना, मिलनचोकबाट दुई जना र नेपालगञ्ज रोडबाट एक जनालाई गिरफ्तार गरिएको डिएसपी मरासिनीले जानकारी दिए ।

photo20161204rupandehi3

इन्सेक पाल्पा जिल्ला प्रतिनिधि यज्ञमूर्ति तिमल्सिनाका अनुसार अनिश्चितकालिन पाल्पा बन्दको पाचौँ दिन मङ्सिर १९ गते पनि पाल्पाको जनजीवन प्रभावित भएको छ ।

जिल्लामा क्रियाशील राजनीतिक दल र विद्यार्थी सङ्गठनहरूले संयुक्त सङ्घर्ष समिति गठन गरी बन्दको आयोजना गरेका हुन् । बन्दका कारण लामो तथा छोटो दुरीका सार्वजनिक सवारी सधान चलेका छैनन् । विद्यालय तथा कलकारखानासमेत ठप्प छन् ।

सरकारले नियतवश तराई र पहाडका जिल्लाहरूलाई टुक्र्याउन लागेको आरोपमा विरोध स्वरुप बन्द तथा प्रदर्शन गरिएको नेपाली काङ्ग्रेस पाल्पाका सभापति बीरबहादुर रानाले बताए । हिमाल पहाड तराई कोही छैन पराई भन्ने सन्देशलाई कायम गराउन पनि यसप्रकारको दबाव आवश्यक रहेको अखण्ड नेपाल पार्टीका अध्यक्ष दिनेश रावलले बताए । बन्दकर्ताले तरकारी, दुध, एम्बुलेन्स, विवाह, प्रेस, मानव अधिकारकर्मीलगायतका सवारी साधनलाई भने निर्वाध सञ्चालन हुन दिएका थिए ।

बन्दका क्रममा कुनै अप्रिय घटना नभएको प्रहरीले जनाएको छ । विरोध कार्यक्रम अन्तर्गत मङ्सिर २० गते जिल्ला सदरमुकाममा बृहत जनप्रदर्शन कार्यक्रमको आयोजना गरिएको नेकपा एमाले पाल्पाका अध्यक्ष नारायण आचार्यले जानकारी दिए ।

आन्दोलनकारीले पाल्पामा युपी ५३ ए जेट ०२५२ नम्बरको भारतीय मोटरसाइकल र बा १ ख ५४८८ नम्बरको टिपर तोडफोड गरेकाे राससले जनाएकाे छ ।

इन्सेक कपिलवस्तु जिल्ला प्रतिनिधि नन्दराम पौडेलका अनुसार मधेश र पहाडलाई छुट्याउन खोजिएको आरोपमा असन्तुष्ट पक्षले मङ्सिर १९ गते पनि जिल्लाका विभिन्न स्थानमा दिनभर प्रदर्शन गरेका छन् ।

अनिश्चितकालिन बन्दको घोषणाले जिल्लाको जनजीवन प्रभावित बनेको छ । नेकपा एमाले, नेपाली काङ्ग्रेस, नेकपा माओवादी केन्द्र, जनमोर्चा नेपाल, नेकपा माले, अखण्ड पार्टी लगायतका पार्टी तथा तिनका भातृ सङ्गठनहरूले सडकमा टायर बालेर प्रदर्शन गरेका थिए । बन्दका कारण उद्योगधन्दा कलकारखाना, विद्यालय, बजार तथा पूर्व पश्चिम राजमार्ग ठप्प पारेका छन् । चन्द्रौटा, जितपुर, इमिलिया बनगाईलगायतका स्थानमा विद्यार्थी युवाहरूले प्रदर्शन जारी राखेका छन ।

सरकारले विवादै नभएको प्रदेशलाई विवाद निकालेर राष्ट्रलाई विखण्डन बनाउने राष्ट्रघाती संशोधन प्रस्ताव फिर्ता नहुञ्जेल आन्दोलन जारी राख्ने एमाले अध्यक्ष झविलाल पोखरेल चेतावनी दिएका छन ।

इन्सेक गुल्मी जिल्ला प्रतिनिधि टोपलाल अर्यालका अनुसार गुल्मीमा मङ्सिर १५ गतेदेखि जारी आन्दोलनका कारण यहाँको जनजीवन थप कष्टकर बन्न थालेको छ । आज सदरमुकामको लाँकुरी मञ्चबाट सुरु भएको राँके जुलुसले बजार परिक्रमा गरेको थियो । त्यस अघि विरोध र्‍यालीसमेत निकालिएको थियो । आन्दोलनकारीले सडकमा टायर बालेर विरोध प्रदर्शन गरेका थिए । विरोध कार्यक्रममा 'सिमाङ्कन हेरफेर गर्न पाइँदैन, पाँच नम्बर प्रदेश टुक्राउन पाइँदैन, हाम्रो आन्दोलन जारी छलगायतका नाराहरू लगाउँदै विरोध गरेका थिए ।

आन्दोलनलाई सम्वोधन गर्दै आन्दोलन परिचालन कमिटीका संयोजक एवम् नेपाली काङ्ग्रेसका जिल्ला पार्टी सभापति भुवनप्रसाद श्रेष्ठले सरकारले संशोधन फिर्ता लिएर अखण्ड ५ नं प्रदेश घोषणा नगरे सम्म कुनैपनि हालतमा आफूहरू आन्दोलनबाट पछि नहट्ने बताए ।

गुल्मी उद्योग बाणिज्य सङ्घमा आयोजना गरिएको पत्रकार सम्मेलनमा मङ्सिर २० गते तम्घासमा हुने विशाल आमसभा गर्ने तयारी रहेको परिचालन कमिटीले जानकारी दिएको छ । आन्दोलनलाई अराजक बन्न नदिनको लागि स्वयम्सेवक दल समेत गठन गरिएको छ ।

आन्दोलन अवधिभर कुनै पनि राजनीतिक दलको झण्डा प्रयोग नगर्ने पनि परिचालन कमिटीले निर्णय गरेको छ ।

जिल्ला बन्दले उद्योगी व्यावसायी, यात्रु, सेवाग्राही तथा बिरामीहरूलाई सास्ती भएको छ । विद्यालय तथा शैक्षिक संस्था भने निर्वाध रूपमा सञ्चालनमा छन् ।

संविधानप्रति असन्तुष्टी जनाउँदै आएका केही राजनीतिक दलको मागलाई सम्बोधन गर्ने नाममा सरकारले आम नागरिकको चाहना र भावना विपरित गएर संविधान प्रस्ताव संशोधन गर्न लागेको भन्दै स्थानीय आन्दोलित बनेको गुल्मी उद्योग बाणिज्य सङ्घका अध्यक्ष दुर्गा पाण्डेयले बताए ।

जिल्लामा शान्तिपुर्ण रूपमा विरोध प्रदर्शन भएको तर स्थिति कुनै पनि बेला भडि्कन सक्छ भनेर सुरक्षाकर्मीहरू तयारी अवस्थामा राखिएको जिल्ला प्रहरी कार्यालयका एसपी भोला रावलले बताए ।

फोटोः रिमा विसी, रुपन्देही


अनलाइन डेस्क