परिचय–पत्र पाउनु पर्ने मागगर्दै तीन दिनदेखि जिल्ला प्रशासनमा धर्ना

  ०७५ साउन १५ गते

वास्तविक गरिब परिवारले परिचय–पत्र पाउनु पर्ने मागगर्दै जिल्ला प्रशासन कार्यालय हुम्लामा पीडितहरू तीन दिनदेखि धर्नामा बसेका छन् ।
नेपाल सरकार गरिबी तथा सहकारी विकास मन्त्रालयद्वारा वितरण गरिएको गरिब घर परिवार छनौट प्रक्रियामा हुम्लाका स्थानीयबासी गरिब घरधुरी सर्वेक्षणका क्रममा करिब ४ हजार वास्तविक गरिब परिवार छुटेको भन्दै स्थानीयबासी आक्रोशित बनेका छन् ।
नाम छुटेको विषयमा एक हप्ता सूचना जारी पश्चात फारम भरेको भए पनि नाम समावेश नगरेको भन्दै सिमकोट गाउँपालिका–१ बरगाउँ, सोही गाउँपालिका–६ का स्थानीयबासीे जिल्ला प्रशासन कार्यालयमा धर्नामा बसेको सोही गाउँपालिका–१ का स्थानीयबासी छिरिङ् लामाले बताए ।
०७० सालमा सङ्कलन गरेको विवरणका आधारमा हुम्लामा गरिब परिचय–पत्र वितरण भएपछि वास्तविक गरिबहरू छुटेको भन्दै सो कार्यालयमा धर्ना दिन बाध्य भएका हुन् ।
जिल्लाका वास्तविक गरिब नपरेर धनी व्यक्ति परेको देखिएपछि स्थानीयबासी मर्कामा परेको सिमकोट गाउँपालिका–१ का वडा अध्यक्ष ताप्का लामाले बताए । उनले भने–‘२०७० सालमा जिविसबाट विवरण सङ्कलन गर्दा सामाजिक परिचालकको कमजोरीले हुम्लाका हजारौँ गरिब घर परिवार परिचय–पत्र पाउनबाट वञ्चित भएका छन् ।’
नेपाल सरकारले विभेदपूर्ण ढङ्गले हेरेको भन्दै धर्नामात्र नभएर हुम्ली सबै मिलेर आन्दोलनमा उत्रिने समेत प्रमुख जिल्ला अधिकारी माधव प्रसाद ढुङ्गानालाई चेतवानी दिएका छन् ।
वास्तविक गरिबहरूको पहिचानका लागि गरिब घर परिवार छनौट समितिको बोर्डको बैठक बस्ने तयारी भएको प्रमुख जिल्ला अधिकारी ढुङ्गानाले बताए । समस्या समाधानका लागि केन्द्रीय तहमा समन्वय गर्ने प्रजिअ ढुङ्गानाले आश्वासन दिए ।


नन्द सिंह