पत्रकार हत्या घटनाका आरोपित गिरफ्तार

  ०७७ भदौ २६ गते

जितपुरसिमरा उमनपा–२० इनर्वासिरा निवासी ४२ वर्षीय पत्रकार वीरेन्द्रप्रसाद साहलाई हत्या गरेको आरोपमा प्रहरीले महागढिमाई नपा–२ तेलकुँवा टोलका ४५ वर्षीय हरेराम पटेल भनिने हरेरामप्रसाद कुर्मीलाई भदौ २५ गते गिरफ्तार गरेको छ ।

पत्रकार साहलाई ०६४ असोज १८ गते बारागढी गाउँपालिका–३ पिप्रा बसतपुरबाट अपहरण गरी जितपुरसिमरा उमनपा–१६ टाँगियावस्तीको जङ्गलमा हत्या गरी खाल्टो खनी गाडेको आरोपमा कुर्मीलाई १३ वर्षपछि भदौ २५ गते कोल्हवी नपा–४ सपही टोलबाट गिरफ्तार गरेको जिल्ला प्रहरी कार्यालयका एसपी कृष्णप्रसाद पङ्गेनीले बताउनु भयो ।

पत्रकार साहको अपहरण भएको ३४ दिनपछि ०६४ कात्तिक २२ गते राति जितपुरसिमरा उमनपा–१६ टाँगियावस्तीको पूर्व दक्षिण तर्फको जङ्गलमा खाल्टो खनेर गाडेको अवस्थामा शव फेला परेको थियो ।

पत्रकार साहलाई अपहरण गरी हत्या गरेको घटनाका दोषी मध्येका जिपपुरसिमरा उमनपा–२० इनर्वासिराका ५० वर्षीय मेनेजर गिरी बारा जिल्ला अदालतको आदेशमा ११ वर्ष कैद भुक्तानी गरी रिहा भइसकेको जिल्ला अदालतका श्रेस्तेदार कौशलेस ज्ञवालीले बताउनु भयो ।

पत्रकार साह हत्याका अर्का दोषी बारागढी गाउँपालिका–३ नयकाटोलका ४९ वर्षीय रामएकवाल सहनी जिल्ला अदालतको फैसला अनुसार कारागार कार्यालय बीरगंजमा कैद भुक्तान गरिरहेको एसपी पङ्गेनीले बनाउनु भयो ।

त्यस्तै पत्रकार साह हत्या घटनाका मुख्य आरोपित बारागढी गाउँपालिका–६ गढहलका ५१ वर्षीय कुन्दन फौज्दारलाई ०७६ फागुन २५ गते बिहान फौज्दारको घरबाटै गिरफ्तार गरेको एसपी पङ्गेनीले बताउनु भएको छ ।


भोलानाथ पौडेल