पत्नी हत्या घटनाका आरोपित गिरफ्तार

  ०७६ वैशाख २६ गते

शरीरमा मटितेल खन्याएरआगो लगाइ पत्नी निर्मला यादवको हत्या गरेको आरोपमा प्रहरीले शहिदनगर नपा–१ चिरैयाका २४ वर्षीय मुकेश गोइत यादवलाई गिरफ्तार गरी वैशाख २६ गते पत्रकार सम्मेलनमार्फत सार्वजानिक गरेको छ ।

२० वर्षीया निर्मला यादवलाई आरोपितले वैशाख ५ गते मटितेल जिउमा खन्याएर आगो लगाएका थिए । गम्भीर घाइते बनेकी निर्मलाको काठमाडौँ किर्तिपुर अस्पतालमा उपचारको क्रममा वैशाख १६ गते मृत्यु भएको थियो ।

घटनापछि फरार मुकेशलाई प्रहरीले विशेष सूचनाको आधारमा सुदूरपश्चिम प्रदेशको कञ्चनपुर गड्डाचौकीमा रहेको प्रहरी चौकीले वैशाख २५ गते गिरफ्तार गरी धनुषा जिल्ला प्रहरी कार्यालयलाई बुझाएको थियो ।

भाउजुसँगको सम्बन्धको कारण मुकेशले पत्नी निर्मलालाई हत्या गरेको अनुसन्धानका क्रममा खुलेको जिल्ला प्रहरी कार्यालय धनुषाले जनाएको छ ।

मुकेशले दिएको वयानको आधारमा उनकी २५ वर्षीया भाउजु श्यामा देवी यादवलाई पनि गिरफ्तार गरी अनुसन्धान गरिरहेको प्रहरीले जनाएको छ ।

वैशाख ५ गते दिउँसो घरमा कोहि नभएको मौकाछोपी आरोपितले निर्मलाको हातगोडा बाँधेर जिउमा मटितेल खन्याई आगो लगाका थिए ।

आगोबाट निर्मलकाको शरीरको ७० प्रतिशत भागको छाला जलेर उनी गम्भीर घाइते भएकी थिइन् । घटनापछि गम्भीर घाइते निर्मलालाई उपचारका लागि जनकपुर अञ्चल अस्पतल लगिएकोमा उपचार सम्भव नभएपछि थप उपचारको लागि काठमाडौँको किर्तिपुर अस्पतालमा लगिएको थियो ।

निर्मलाको १० महिनाअघि मात्र समाजिक परम्परा अनुसार विवाह भएको थियो । माइतीपक्षले छोरी निर्मलालाई हत्या गर्ने प्रयास भएको भन्दै पति मुकेश गोइत यादव, ससुरा झरी गोइत यादव र सासूमाथि ज्यान मार्ने उद्योगमा कार्वाहीको माग गर्दै इलाका प्रहरी कार्यालय सबैलामा वैशाख ९ गते उजुरी दिएको थियो ।


विनोदकुमार रविदास