समाचारहरू

डाडाँफया गाविस-२ की २२ वर्षीया लुकमति सिंहको हत्या गरेको आरोपमा प्रहरीले उनका २३ वर्षीय पति मानबहादुर सिंहलाई असोज १२ गते गिरफ्तार गरेको छ ।

पीडित महिलासँग बहुविवाहका विषयमा विवाद भएपछि असोज ७ गते छातीमा हिर्काएर लुकमतीको हत्या गरेको आरोपमा माइती पक्षले असोज ८ गते धारापोरी प्रहरी चौकीमा मानबहादुरविरुद्ध उजुरी दिएका थिए ।

स्थनीयबासीले दिएको सूचना र प्रहरी अनुसन्धानपछि मानबहादुरले पत्नीको हत्या गरेको रहस्य खुलेको जिल्ला प्रहरी कार्यालय हुम्लाका इन्स्पेक्टर ओमप्रकाश यादवले बताए ।

हत्यापछि मृतकलाई पतिले शौचालयको खाल्टो भित्र पुरेको अवस्थामा असोज १२ गते लाश फेला परेको इन्स्पेक्टर यादवले जानकारी दिए ।

पीडित महिलाको शवको पोष्टमार्टम असोज १३ गते जिल्ला अस्पताल हुम्लामा गरिएको प्रहरीले जनाएको छ ।

नन्द सिंह