पत्नीलाई हत्या प्रयास गरेको आरोपमा उजुरी

  ०७४ पुस ३० गते

लहान नपा-१३ की ३५ वर्षीया रामवती महतोलाई उनका पति ४० वर्षीय महेश्वर महतोले हत्या प्रयास गरेको आरोपमा इलाका प्रहरी कार्यालय लहानमा पीडित पक्षले पुस ३० गते उजुरी हाले ।

पीडित परिवारका अनुसार आरोपितले पटक पटक घरायसी विवादमा यातना दिँदै आएको र पुस २८ गते राति घरायसी विवादमा लठीले कुटपिट गरी घाँटी थिची हत्या प्रयास गरेको र मृत्यु नभएपछि  बन्चरो प्रहार गरी हत्या गर्न लाग्दा स्थानीयहरूले उद्धार गरेको बताए ।

सो कार्यमा आरोपितका दाजु ५० वर्षीय चन्द्रशेखर महतो र भाउजु ४० वर्षीया अनिता महतोले समेत सघाएको पीडित परिवारले बताए । पीडित महिलाको उपचार लहान स्थित रामकुमार उमाप्रसाद अस्पतालमा भइरहेको छ ।

इलाका प्रहरी कार्यालय लहानका डिएसपी गणेश चन्दका अनुसार आरोपित फरार रहेकोले घटनाको अनुसन्धान गरी कारबाही प्रकृया अगाडि बढाउने बताए ।


दुर्गा परियार