पत्नीलाई हत्या गरेको घटनामा २० वर्ष कैदको फैसला

  ०७६ फागुन २३ गते

२३ वर्षीया पत्नी रत्ना रावतलाई हत्या गरेको घटनामा सुर्खेतको लेकबेसी नपा–८ साटाखानीका ३० वर्षीय नवलसिंह बिरकट्टालाई दैलेख जिल्ला अदालतले २० वर्ष कैद र एक लाख रुपियाँ क्षतिपूर्ति तिर्नुपर्ने फैसला गरेको छ ।

जिल्ला न्यायाधीश दण्डपाणी लामिछानेको इजलासबाट फागुन २२ गते उक्त फैसला भएको अदालतका सूचना अधिकारी बिनोद आचार्यले जानकारी दिनुभयो । हत्या गरिएकी रत्नाका नजिकका आफन्तले क्षतिपूर्ति रकम पाउने आचार्यले बताउनुभयो ।

चार वर्ष अघि माइतीगाउँ चामुण्डाका स्थानीय युवासँग विवाह गरी भारतको गढवाल पुगेकी रत्नालाई उहाँको अघिल्लो पतिसँगै मजदूरी गर्ने नवलसिंहले त्यहाँबाट भगाएर ६ महिना सिम्लामा राखेर सुर्खेतको साटाखानी पु¥याएका थिए । विवाह भएको दोश्रो वर्षमै दोश्रो पत्नी भित्र्याएपछि दम्पतिबीच असमझदारी बढ्दै गरेको थियो ।

चामुण्डाबिन्द्रासैनी नपा–३ पिङडाँडास्थित माइतीघर आएको तेश्रो दिन ०७६ जेठ ९ गते गोठाला गएको मौका पारी चामुण्डाबिन्द्रासैनी नपा–१ काफलगैरामा नवलसिंहले हत्या गरेको प्रहरी अनुसन्धान र घटना प्रकृतिले पुष्टी गरेको अदालतको फैसलामा उल्लेख छ ।

घटनाको दोश्रो दिन नवलसिंहले रत्नाको शव काफलगैरामा रहेको भनी नेपाल भारतको सीमाना रुपैंहिडिया पुगेर टेलिफोनमा खवर छोडेको आधारमा खोजी गर्दा मृत शरीर फेला परेको थियो । शवको पोष्टमार्टम दुल्लू अस्पतालमा भएको थियो । शव परीक्षण प्रतिवेदनमा घाँटी थिची हत्या गरेको उल्लेख छ ।

पीडित पक्षले जेठ ११ गते कर्तव्य ज्यान अर्थात हत्या आरोपमा उजूरी दिएको थियो । सो उजूरीका आधारमा आरोपितलाई प्रहरीले भारतीय प्रहरीको सहयोगमा असार ३ गते भारतको सिमलाबाट गिरफ्तार गरेको थियो ।

सो मुद्दामा प्रहरीले अनुसन्धान सकेर जिल्ला सरकारी वकील कार्यालयमार्फत असार २३ गते दैलेख जिल्ला अदालतमा पेश गरेकोमा त्यही दिन भएको थुनछेक आदेशमा अदालतले नवलसिंहलाई पूर्पक्षका लागि दैलेख कारागार पठाएको थियो ।

आरोपितको प्रतिरक्षाका निम्ति दैलेख जिल्ला अदालतका वैतनिक वकील सर्वराज जोशी र पीडित पक्षको तर्फबाट जिल्ला सरकारी वकील कार्यालयका जिल्ला न्यायाधिवक्ता द्रोणदत्त पौडेलले बहस गर्नुभएको थियो ।

 


अमर सुनार