पत्नीलाई मट्टितेल छर्केर आगो लगाएको घटनाका आरोपितविरूद्ध प्रहरीमा उजुरी

  ०७६ वैशाख १० गते

शहीदनगर नपा–१ चिरैयाकी २१ वर्षीया निर्मलादेवी यादवलाई मट्टितेल छर्केर आगो लगाएको घटनाका आरोपित पति २३ वर्षीय मुकेशकुमार गोइत यादवविरूद्ध पीडित पक्षले वैशाख ९ गते इलाका प्रहरी कार्यालय सबैलामा उजुरी दिएको छ ।

घटनाका आरोपित फरार रहेकोले खोजी कार्य जारी रहेको र घटनाको अनुसन्धान भइरहेको इलाका प्रहरी कार्यालय सबैलाका इन्स्पेक्टर चन्द्रभुषण यादवले बताए ।

घरमा कोही नभएको अवस्थामा आरोपितले पत्नी निर्मलालाई वैशाख ५ गते मट्टितेल छर्केर आगो लगाई फरार भएको जिल्ला प्रहरी कार्यालयका डिएसपी रामेश्वर कार्कीले बताए ।

घाइते निर्मलाको उपचार जनकपुर अञ्चल अस्पतालमा सम्भव नभएपछि थप उपचारका लागि टिचिङ अस्पताल काठमाडौँ रेफर गरिएको थियो ।

त्यहाँ पनि उपचार सम्भव नभएपछि घाइते निर्मलालाई कीर्तिपुर अस्पताल काठमाडौँमा लगी उपचार भइरहेको छ ।

निर्मलाको कुम र छाती भन्दा तलको भाग जलेको छ । उपचारमा संलग्न डा. सुरेन्द्रजङग बस्नेतले निर्मलाको ३५ प्रतिशत बढी शरीरको भाग जलेको बताएका छन् ।

दाइजोको कारण बिहान पतिसँग सामान्य झगडा भएको र त्यसकै निहुँमा दिउँसो निर्मलाको शरीरमा मट्टितेल छर्केर आगो लगाएको पीडित पक्षको आरोप छ ।

पीडित निर्मलाको १० महिनाअघि शहीद नपा–१ स्थित चिरैया गाउँमा मुकेश कुमारसँग विवाह भएको थियो ।

९ लाख रुपियाँ कर्जा लिएर बहिनीको विवाह गरेको निर्मलाका दाई राकेश यादव बताउँछन् । विवहामा ३ लाख रुपियाँ नगद, डेढ तोला सुन र केही जिन्सी दाइजो दिएको उनले बताए ।


विनोदकुमार रविदास