पत्नीको हत्या गरेको कसुरमा जन्मकैदको फैसला

  ०७३ भदौ ९ गते

तेरहौता गाविस-५ नयाँ वस्तीकी ३५ वर्षीया सन्तोषी चौधरी राईको हत्या गरेको कसुरमा मृतकका ३७ वर्षीय पति नरेश राईलाई जिल्ला अदालतले भदौ ८ गते जन्मकैद सजायको फैसला गरेको छ ।

न्यायाधीश शारदाप्रसाद कोइरालाको इजलासले पूर्पक्षमा थुनामा रहेका राईलाई जन्मकैद सजायको फैसला गरेको अदालतका श्रेस्तेदार नरेन्द्रकुमार श्रेष्ठले जानकारी दिए ।

मादक पदार्थ सेवन गरेर खाना नपकाएको भन्दै ०७१ चैत ९ गते पन्युले टाउकोमा प्रहार गरी घाइते बनाइएकी पीडितको चैत १० गते बिहान मृत्यु भएको थियो । राईलाई प्रहरीले चैत १० गते गिरफ्तार गरेको थियो । शवको पोस्टमार्टम राजविराजस्थित गजेन्द्रनारायण सिंह सगरमाथा अञ्चल अस्पतालमा चैत १० गते भएको थियो ।

मृतककी दिदी मोरङको कोसी हरैचा नपा-४ की ३६ वर्षीया देवी चौधरी दर्नालले जिल्ला प्रहरी कार्यालय सप्तरीमा ०७१ चैत १२ गते उजुरी दिएकी थिइन् । न्यायाधीश तेजनारायण पौडेलको इजलासले आरोपित ०७२ वैशाख ७ गतेदेखि पूर्पक्षका लागि राजविराज कारागारमा थुनामा रहेका थिए ।


मनोहरकुमार पोखरेल