न्यायको माग गर्दै जिल्ला प्रशासनमा ज्ञापन पत्र

   ०७६ पुस २२ गते

मिक्वाखोला गाउँपालिका–२ खोक्लिङकी ३४ वर्षीया कविता थापाको रहस्यमय हत्या भएको घटनामा न्यायको माग गर्दै पीडित पक्षले जिल्ला प्रशासन कार्यालयमा पुस २२ ज्ञापनपत्र बुझाएको छ ।

मिक्वाखोला गाँउपालिका–२ स्थित अधेरी आधारभूत विद्यालय नजिकको सडकमा पुस ५ गते थापाको शव फेला परेको थियो । घटना भएको १८ दिनसम्म प्रहरीले अनुसन्धान नगरेको र घटनामा संलग्नको खोजीमा चासो नदिएको ज्ञापनपत्रमा उल्लेख छ ।

प्रमुख जिल्ला अधिकारी डोरेन्द्र निरौलाले पीडित पक्षले बुझाएको ज्ञापनपत्र बुझ्दै पीडितलाई न्याय दिलाउन आफूले पहल गर्ने बताउनुभयो । मिक्वाखोला गाँउपालिका–२ का वडाबासीको हस्ताक्षर रहेको ज्ञापनपत्रमा एकसाता भित्र घटनाको वास्तविक अनुसन्धान गरी दोषीलाई सार्वजनिक गर्न माग गरिएको छ ।

बलात्कारपछि हत्या गरिएको अवस्थामा शव फेला परेको वडाबासीको भनाइ छ ।

शवको पोष्टमार्टम पुस ६ गते जिल्ला अस्पतालमा गरिएको र घटनाका विषयमा सुक्ष्म ढङ्गले अनुसन्धान गरीरहेको जिल्ला प्रहरी कार्यालयका डिएसपी ज्ञानेन्द्रप्रसाद फुयाँलले बताउनुभयो ।

 


देवराज गुरुङ