न्यायको माग गर्दै जिल्ला प्रशासन कार्यालयमार्फत् प्रधानमन्त्रीलाई ज्ञापनपत्र

   ०७६ पुस २९

जिल्ला धनुषा मिथिला नगरपालिका–५ का २४ वर्षीय ओमप्रकाश महतो हत्या घटनाका दोषीलाई कारबाही माग गर्दै नेपाल पिछडावर्ग महासङ्घ विराटनगरले पुस २८ गते जिल्ला प्रशासन कार्यालय मोरङ मार्फत् प्रधानमन्त्रीलाई ज्ञापनपत्र पठाएको छ ।

पिछडावर्ग महासङ्घले ओमप्रकाशको नियोजित हत्या भएको र सो घटनामा संलग्नलाई तत्काल गिरफ्तार गरी कानूनी कारबाही गर्न माग गरेको छ ।

महतोलाई क्रसर सञ्चालकले हत्या गरेको र दोषीलाई कारबाही माग गर्दै मोरङका प्रमुख जिल्ला अधिकारी मदन भुजेल मार्फत प्रधानमन्त्री केपी शर्मा ओलीलाई ध्यानाकर्षण गराएको महासङ्घका अध्यक्ष मदनकिशोर कामतले बताउनुभयो ।

महतोको ०७६ पुस २५ गते क्रसर सञ्चालकले रड प्रहार गरी हत्या गरेको पीडित पक्षको आरोप छ । महासङ्घ बुझाएको ज्ञापनपत्रमापीडित परिवारलाई क्षतिपूर्तिसहित रोजगारीको माग गरिएको छ ।

मोरङका प्रमुख जिल्ला अधिकारी मदन भुजेलले पीडित पक्षले बुझाएको ज्ञापनपत्र प्रधानमन्त्री कार्यालयमा पठाईने र निर्देशन बमोजिम कारबाही प्रक्रिया अघि बढ्ने बताउनु भएको छ ।
Photo 20200114 Morang (2)

Photo 20200114 Morang (1)

 


नेत्र पी अधिकारी