नेविसङ्घका कार्यकर्ता र प्रहरीबीचको झडपमा दुई जना घाइते

  ०७५ माघ २१ गते

नेपाल विद्यार्थी सङ्घ कास्कीले माघ २० गते बेलुकी मसाल जुलुस निकाल्ने क्रममा पृथ्वीनारायण क्याम्पस, पोखरामा प्रहरीसँग भएको झडपमा दुईजना विद्यार्थी घाइते भएका छन् ।

नेपाली कांग्रेसले माघ २१ गते आह्वान गरेको देशव्यापी विरोध कार्यक्रमको अघिल्लो दिन मसाल जुलुस निकाल्दै गर्दा प्रहरीले हस्तक्षेप गरेपछि दोहोरो झडप भएको नेपाल विद्यार्थी सङ्घ, कास्कीले जनाएको छ । सङ्घका अनुसार दोहोरो झडपमा परी दुईजना विद्यार्थी घाइते भएका छन् ।

घाइते हुनेमा नेपाल विद्यार्थी सङ्घका कार्यकर्ता तनुहँ घर भइ पोखरा मनपा–५ प्रस्याङ बस्ने ३१ वर्षीय पशुपति भट्टराई र पोखरा मनपा–२६ घर भई पोखरा मनपा–१ बस्ने २१ वर्षीय फिरोज सुवेदी रहेका नेपाल विद्यार्थी सङ्घका निवर्तमान जिल्ला सभापति विकास थापाले जानकारी दिए । घाइतेहरूको उपचार फिस्टेल अस्पतालमा गरिएको थापाले बताए ।

आन्दोलनत विद्यार्थीले ढुङ्गामुढा गरेका कारण प्रतिवाद गर्दा घटना भएको जिल्ला प्रहरी कार्र्यालय कास्कीले जनाएको छ ।


सुशन घिमिरे