समाचारहरू

नेत्र विक्रम चन्द(विप्लव) नेतृत्वको नेपाल कम्युनिष्ट पार्टीका जिल्ला सदस्य तथा पूर्व जिल्ला इञ्चार्ज सिदिङ्मा गाउँपालिका–४ साब्लाखुका ३४ वर्षीय सागर पन्दाक लिम्बु(सक्कक) लाई प्रहरीले चैत १२ गते फुङलिङ नगरपालिकास्थित बजारक्षेत्रबाट गिरफ्तार गरेको छ ।

पन्दाकविरूद्ध जिल्ला अदालत ताप्लेजुङमा हातहतियार तथा विस्फोटक पदार्थ सम्बन्धी कसुरमा ०७६ माघ ८ गते मुद्दा दर्ता भएकाले गिरफ्तार गरिएको जिल्ला प्रहरी कार्यालयका इन्स्पेक्टर मोहन पोखरेलले इन्सेक प्रतिनिधिसँगको फोन सम्पर्कमा बताउनु भयो ।

पन्दाक जिल्ला अदालतले माग गरेको १ लाख रुपियाँ धरौटी बझाएर चैत १३ गते तारेखमा छुटेको अदालतका श्रेस्तेदार शम्भुप्रसाद रेग्मीले जानकारी दिनु भयो ।

जिल्ला इञ्चार्ज असल पन्दाक लिम्बूले इन्सेक प्रतिनिधिसँगको फोन कुराकानीमा ०७८ वैशाख १३ गते अदालतमा उपस्थित हुने गरी तारेख पाएको बताउनु भयो ।

मेची–कोशी इञ्चार्ज प्रकाशले चैत १३ गते विज्ञप्ति जारी गरेर प्रहरीले गिरफ्तार गरेका पूर्व जिल्ला इन्चार्ज पन्दाकलाई तत्काल रिहा गर्न माग गर्नु भएको छ ।

नेपाल सरकार र नेत्र विक्रम चन्द(विप्लव) बिच ०७७ फागुन २० गते भएको वार्तापछि  सरकारले सो पार्टीको प्रतिबन्धमाथि फुकुवा गरेको छ ।

सरकारले विप्लव नेतृत्वको पार्टीले राज्यविरूद्धका गतिविधि गरेको भन्दै ०७५ फागुन २८ गतेदेखि प्रतिबन्ध लगाएको थियो ।

गिरफ्तार भएका पन्दाकको स्वास्थ्य परीक्षण जिल्ला अस्पतालमा चैत १३ गते गरिएको छ ।

देवराज गुरुङ