नेपाल कम्युनिष्ट पार्टीद्वारा उम्मेदवारको घर कब्जा

  ०७४ कात्तिक १७ गते

नेपाली काङ्ग्रेसका प्रदेश सभा सदस्यका उम्मेदवार गोविन्दबहादुर कार्कीको घर कात्तिक १७ गते नेत्रविक्रम चन्द विप्लव नेतृत्वको 'नेपाल कम्युनिष्ट पार्टी भोजपुरले कब्जा गरेको जनाएको छ ।

पार्टीले विज्ञप्ति जारी गर्दै उम्मेदवारी फिर्ता गर्न अनुरोध गरेकोमा बेवास्ता गरेको भन्दै भोजपुर नगरपालिका-१२ टक्सारस्थित रहेको कार्कीको घर कब्जा गरेको जनाएको छ । जिल्ला प्रहरी कार्यालयले भने घर कब्जाको विषयमा जानकारी लिने काम भइरहेको जनाएको छ ।

कार्कीले प्रदेश सभा निर्वाचनमा भोजपुर (ख) बाट प्रत्यक्षमा उम्मेदवारी दिएका छन् । यस विषयमा जानकारी लिँदा उम्मेदवार कार्कीले भने आफूलाई जानकारी नआएको बताएका छन् ।

द्वन्द्वको समयमा कार्कीको घरजग्गा तत्कालीन नेकपा माओवादीले कब्जा गरेपछि उनि काठमाडौँमा विस्थापित भएका थिए । अन्य उम्मेदवारको घर पनि कब्जा गर्ने योजना रहेको सो पार्टीका जिल्ला सेक्रेटरी मादेन किरातीले बताए ।


किरण राई