नेपाल कम्युनिष्ट पार्टीका कार्यकर्ता गिरफ्तार

  ०७४ असार १० गते

निर्वाचन विरोधी गतिविधि गरेको आरोपमा नेपाल कम्युनिष्ट पार्टीका कार्यकर्तालाई प्रहरीले बढैयाताल गाउँपालिका-४ खैरेनीबाट असार ९ गते गिरफ्तार गरेको छ ।

बढैयाताल गाउँपालिका-४ निवासी नेपाल कम्युनिष्ट पार्टीका कार्यकर्ता ३१ वर्षीय खुमबहादुर गिरी र सोही ठाउँका ४६ वर्षीय चन्द्रबीर बिकलाई प्रहरीले गिरफ्तार गरेको हो । उनीहरूलाई इलाका प्रहरी कार्यालय मैनापोखरको गस्ती टोलीले गिरफ्तार गरी हिरासतमा राखेको प्रहरीले जनाएको छ ।

गिरफ्तार गरिएका नेपाल कम्युनिष्ट पार्टीका कार्यकर्तालाई स्थानीय निर्वाचन विरोधी गतिविधि गरेको आरोपमा सार्वजनिक मुद्दा चलाउने तयारी भएको इलाका प्रहरी कार्यालय बर्दियाका इन्स्पेक्टर देवेन्द्रबहादुर मल्लले बताए । यस अघि विभिन्न समयमा प्रहरीले नेपाल कम्युनिष्ट पार्टीका १३ जना कार्यकर्तालाई गिरफ्तार गरी निर्वाचन विरोधी गतिविधि गरेको आरोपमा सार्वजनिक मुद्दा चलाएको थियो ।


मानबहादुर चौधरी