नेपाली कांग्रेस कार्यकर्तामाथि खुकुरी प्रहार, घटनाका आरोपितविरूद्ध उजुरी

  ०७५ माघ २३ गते

सबैला नपा–१० खरिहानी निवसी नेपाली कांग्रेसका कार्यकर्ता ४८ वर्षीय उमेश कापरलाई माघ २१ गते साँझ स्थानीय नेकपा कार्यकर्ता ५० वर्षीय शिवकुमार कापर ५५ वर्षीय लाल पजियार लगायत नेकपा कार्यकर्ताले धारिलो हतियार प्रहार गरी घाइते बनाएको भन्दै पीडित पक्षले माघ २२ गते जिल्ला प्रहरी कार्यालयमा उजुरी दिएको छ ।

घाइतेको टाउकोमा काटिएकोले जनकपुर अञ्चल अस्पतालमा उपचार सम्भव नभएपछि थप उपचारको लागि विराटनगरस्थित न्युरो अस्पतालमा रिफर गरिएको अस्पतालले जनाएको छ ।

नेपाली कांग्रेसले देशव्यापीरूपमा सरकारविरूद्ध प्रत्येक नगरपालिका र गाउँपालिकामा गरेको विरोधका कार्यक्रम अन्तर्गत माघ २१ गतेको कार्यक्रममा सहभागी भएर घर फर्किरहेका उमेश कापरलाई स्थानीय शिवकुमार कापरलगायतका व्यक्तिले समातेर खुकुरी प्रहार गरी घाइते बनाएको नेपाली कांग्रेसका नेता भोला पञ्जियारले आरोप लगाए ।

घटना राजनीतिक प्रकारका नभएर व्यक्तिगत तथा अपराधिक रहेको जिल्ला प्रहरी कार्यालयका एसपी शेखर खनालले बताए । घाइते उमेश नेपाली कांग्रेसको क्षेत्रीय प्रतिनिधि हुन् ।

प्रहरीले घटनामा संलग्न रहेको आरोपमा स्थानीय चन्दर कापर र सतिश कापरलाई माघ २२ गते गिरफ्तार गरेर अनुसन्धान गरिरहेको छ । मुख्य आरोपित शिवकुमार कापर भने फरार भएको प्रहरीले जनाएको छ ।


विनोदकुमार रविदास