नेकपाको सपथ ग्रहण कार्यक्रममा भएको झडपमा प्रहरीले हस्तक्षेप गर्दा एक जना घाइते

  ०७६ भदौ २५ गते

सप्तरी जिल्ला राजविराज नपा–८ निवासी ४५ वर्षीय सत्तारूढ नेपाल कम्युनिष्ट पार्टी (नेकपा) प्रदेश–२ का प्रदेश सदस्य ४५ वर्षीय देवनाथ यादव प्रहरीको लाठीबाट घाइते भएका छन् ।

नेकपा प्रदेश–२ अन्तर्गतका जिल्ला कमिटीका पदाधिकारीहरूको सपथ ग्रहण कार्यक्रममा झडप हुँदा प्रहरीको लाठी चार्जबाट यादव घाइते भएका हुन् ।

उनको टाउकोमा चोट लागेको थियो । घाइते यादवको भदौ २४ गते जनसेवा अस्पताल वर्दिवासमा उपचार भएको छ ।

महोत्तरीको बर्दिवासमा भादौ २४ गते आयोजित धनुषा, महोत्तरी, सर्लाही, रौतहट, सिरहा र सप्तरी जिल्लाका जिल्ला पदाधिकारीहरूको लागि तय भएको सपथ ग्रहण कार्यक्रम पार्टीभित्र कै असन्तुष्ट पक्षको विरोधका कारण झडप भएको थियो । झडपका क्रममा आक्रोशित कार्यकर्ताहरूले कार्यक्रम स्थलमा रहेका कुर्सी समेत तोडफोड गरेका थिए ।

प्रहरीले झडपलाई नियन्त्रणमा लिन लाठी चार्ज गरेको इलाका प्रहरी कार्यालय बर्दिवासका डिएसपी निशान थापाले बताए ।


अजयकुमार साह