निर्वाचन सुरक्षा सम्वेदनशीलता बढ्योः सुरक्षा समिति

  ०७४ कात्तिक २५ गते

आगामी मङ्सिर १० गते हुने प्रदेश सभा र प्रतिनिधि सभा निर्वाचनको लागि जिल्ला सुरक्षा समितिले निर्वाचन सुरक्षा सम्वेदनशीलता बढेको जनाएको छ ।

स्थानीय तह निर्वाचनमा जिल्लामा नौ ओटा मतदानस्थल अति सम्वेदनशील र १० ओटा निर्वाचनस्थल सम्वेदनशील रहेकामा प्रदेश र प्रतिनिधि सभा निर्वाचन सुरक्षा योजनामा यो सङ्ख्या दोब्बरले बढेको हो ।

जिल्ला सुरक्षा समितिका अनुसार जिल्लाभरी १९ ओटा मतदानस्थल अति सम्वेदनशील २५ ओटा सम्वेदनशील र ८५ ओटा मतदानस्थल सामान्यमा राखिएको छ ।

शैल्यशिखर नगरपालिका, मालिकार्जुन, मार्मा र नौगाड गाउँपालिकाका मतदानस्थल सम्वेदनशीलको सूचीमा परेका छन् । यी गाउँपालिका र नगरपालिकामा स्थानीय तह निर्वाचनको समयमा विवाद तथा झडपका घटनाहरू देखिएका थिए ।

यस्तै यसपटक मतगणनास्थल सदरमुकाम खलङ्गामै हुने भएको कारण ढुवानी जोखिम बढेको छ भने व्यास गाउँपालिका, अपि हिमाल गाउँपालिकालगायतमा हिमपात हुने अवस्थालाई समेत जोखिम मानिएको छ ।

जिल्लाका नौ ओटा स्थानीय तहका १ सय २९ ओटा मतदान केन्द्रको सुरक्षा अवस्था मजबुद हुने गरी निर्वाचन सुरक्षा योजना बनाइएको सशस्त्र प्रहरीका डिएसपी अम्बिकाप्रसाद जोशीले बताए ।

सुरक्षा सम्वेदनशीलता देखाउँदै १ सय २९ मतदान केन्द्रको सुरक्षार्थ २ हजार १ सय १५ जनाभन्दा बढी सुरक्षाकर्मी परिचालन हुने सुरक्षा समितिले जनाएको छ ।

निर्वाचनको पहिलो घेरामा रहने नेपाल प्रहरी र म्यादी प्रहरी गरी १ हजार ५ सयभन्दा बढी सुरक्षाकर्मी परिचालन हुने जनाइएको छ ।


नरेन्द्रसिंह कार्की