निर्वाचन आचारसंहिता विपरीत हलिया पुनःस्थापना निवेदन सङ्कलन

  ०७४ कात्तिक २५ गते

जिल्ला मालपोत कार्यालय, बैतडीले निर्वाचन आचारसंहिता विपरीत कात्तिक २१ गतेदेखि प्रमाणित हलियाहरूको पुनःस्थापना अघि बढाएपछि बाम गठबन्धनले त्यसको विरोध गर्दै कात्तिक २४ गते जिल्ला प्रशासन कार्यालयमा ज्ञापनपत्र बुझाएको छ ।

प्रमाणीकरण भएका हलियाहरूलाई चालू आर्थिक वर्ष भित्र गर्नुपर्ने पुनःस्थापनाको काम अघि बढाउन निवेदन सङ्कलनको काम मालपोतले जारी राखेको गठबन्धनको अरोप छ ।

आचारसंहिता उल्लङ्घन गर्दै 'हलियाहरूलाई सिफारिस गर्नु' भनेर स्थानीय तहलाई मालपोत कार्यालयले पत्र काटेपछि गठबन्धनले उक्त कार्यको विरोध स्वरूप प्रमुख जिल्ला अधिकारीलाई ज्ञापनपत्र बुझाएको हो ।

हलिया पुनःस्थापना जिल्ला कार्यसमितिका अध्यक्षसमेत रहेका प्रमुख जिल्ला अधिकारी सिद्धराज जोशीले निर्वाचनको अवधिमा पुनःस्थापनाको काममा राजनीतिक दलहरूले हस्तक्षेप गरी मतदातालाई लोभ्याउन सक्ने भएकाले उक्त कार्य रोक्न निर्देशन दिएको बताए ।

'हलिया पुनःस्थापनाको काम रोक्न निर्देशन गरेको छु'-उनले भने । हलिया पुनःस्थापना जिल्ला कार्यसमितिको ससदस्यसचिव रहेको जिल्ला मालपोत कार्यालयले दशरथचन्द नगरपालिकाको दुर्गाभवानी र कोटिलाका 'घ' वर्गका मुक्त हलियाहरूलाई अनुदानबापत १ लाख २५ हजार रुपियाँ दिनुपर्ने भएकाले घर मर्मतका लागि लागत सिफारिस बनाउन पत्र पठाएको थियो ।

मालपोत कार्यालयले दशरथचन्द नगरपालिका-३ को वडा कार्यालयलाई पत्र पठाएको नेकपा एमाले जिल्ला कार्यालय सचिव सरस्वती नेपालीको भनाई छ ।

बैतडीमा प्रमाणीकरण भएका २ हजार २२ जना मुक्त हलियामध्ये बाँकी रहेका १ हजार मुक्त हलियाहरूको यसै आर्थिक वर्ष भित्र पुनःस्थापना गर्ने लक्ष्य रहेको जिल्ला मालपोत कार्यालयका निमित्त प्रमुख राजेन्द्रसिंह थापाले बताए ।


नरी बडु