समाचारहरू

आगामी स्थानीय तहको निर्वाचनको लागि सप्तरीका राजनीतिक दलहरूले आचारसंहिता उल्लङ्घन गरी प्रचारप्रसार गर्न थालेका छन् । राजनीतिक दलले चुनावी प्रचारप्रसारको काममा बालबालिकादेखि शिक्षकहरूको समेत प्रयोग गरिरहेका छन् ।

त्यस्तै चोक, स्मारकजस्ता सार्वजनिक र निजी घरहरूमा समेत पोष्टर, झण्डा झुण्ड्याएका छन् । दलहरूका कार्यकर्ताहरूले चुनाव चिन्ह अङ्कित भेष्ट, टोपी, गम्छाको प्रयोग प्रशस्त मात्रामा गरेका छन् । तोकिएको भन्दा बढी सवारी साधनहरूमा तोकिएको आकारभन्दा ठूला आकारका व्यानर र झण्डा राखेर राति अबेरसम्म उम्मेदवारहरू प्रचारप्रसार गरिरहेका छन् ।

निर्वाचन आचरसंहिता २०७२ को परिच्छेद २ को ४ नम्बर 'झ' मा निर्वाचनसम्बन्धी प्रचारप्रसारको लागि धार्मिक, सांस्कृतिक, पुरातात्विक, ऐतिहासिक स्थल वा सार्वजनिक संस्थाको भवन, स्मारक, पर्खाल, सडक, खम्बा वा संरचनालगायतको कुनैपनि सार्वजनिक स्थलमा पर्चा टाँस्न वा टाँस्न लगाउन वा लेख्न वा लेख्न लगाउन नहुने उल्लेख छ ।

यस विषयमा अधिकारकर्मी र सञ्चारकर्मीहरूले जानकारी गराएकोमा जिल्ला निर्वाचन कार्यालयका मुख्य निर्वाचन अधिकृत शारदाप्रसाद कोइरालाले यस्तो काम निर्वाचन आचारसंहिता विपरीत भएपनि उजुरी नआएसम्म कारबाही गर्न नसकिने बताए ।

पार्टीका नेता तथा उम्मेदवारहरूले भने पार्टीले आधिकारिक रूपमा आचारसंहिता उल्लङ्घन नगरेको तर अन्य उम्मेदवारहरूले गरेपछि आफ्ना कार्यकर्ताहरूले पनि गरेको बताउँछन् ।

मनोहरकुमार पोखरेल