निर्मला पन्तका हत्यारालाई कारबाहीको माग राख्दै प्रदर्शन, आफन्तले शव बुझेनन्

  ०७५ साउन १३ गते

बलात्कार पश्चात हत्या गरेको अवस्थामा फेला परेकी १३ वर्षीय बालिका निर्मला पन्तको हत्यामा संलग्नलाई कडा कारबाहीको माग राख्दै साउन १३ गते पीडित पक्षले महेन्द्रनगरमा प्रर्दशन गरेको छ ।

घटनाको अनुसन्धान तथा छानबिन गरिनु पर्ने, दोषीलाई कडा कारबाही हुनुपर्ने, घटनास्थल रहेको ठाउँमा अस्थायी प्रहरी विट राखिनुपर्नेलगायतका माग राख्दै बजारमा, जिल्ला प्रहरी कार्यालयको गेट र अञ्चल असपताल अगाडि प्रदर्शन गरिएको हो ।

शवको पोष्टर्माटम असार ११ गते भएपनि आफन्तले अहिलेसम्म शव बुझेका छैनन् । मृतकका आफन्तहरूले घटनाका दोषीलाई सार्वजनिक नगर्दा र पीडित परिवारलाई न्याय नदिलाउञ्जेलसम्म शव नबुझ्ने भन्दै शव बुझेका छैनन् । मृतक निर्मलाको शव पोष्टर्माटमपछि महाकाली अञ्चल अस्पतालमा राखिएको छ ।

नागरिक समाज, कञ्चनपुरले निर्मला हत्याकाण्ड घटनाप्रति ध्यानाकर्षण भएको जनाउँदै छानबिन गरी संलग्नलाई कानुनी कारबाही गर्न माग सहित प्रमुख जिल्ला अधिकारी कुमार खडकाको ध्यानार्कषण गराएको छ ।

जिल्ला प्रहरी कार्यालय, कञ्चनपुरका डिएसपी ज्ञानबहादुर सेठीले घटनामा संलग्न हुनसक्ने शङ्कास्पद पाँच जनालाई नियन्त्रणमा लिएर घटनाको अनुसन्धान गरिरहेको जानकारी दिए । भीमदत्त नपा–२ उलटाखामकी १३ वर्षीया निर्मला पन्तलाई साउन ११ गते अज्ञात पक्षले बलत्कार पश्चात हत्या गरेको अवस्थामा फेला परेकी थिइन् ।


कोमलनिरञ्जन भाट