निर्मलाको ‘भेजिनल स्वाव’ पुष्टि गर्न निर्मलाकी आमाको रगत नमना सङ्कलन

  ०७५ पुुस २६ गते

बलात्कारपछि हत्या गरिएकी भीमदत्त नपा–२ की १३ वर्षीया बालिका निर्मला पन्तको ‘भेजिनल स्वाव’प्रति परिवारलगायतले शङ्का गरेपछि हो÷होइन भनी पुष्टि गर्न पुस २५ गते निर्मलाकी आमा दुर्गादेवी पन्तको रगतको नमूना लिएको छ ।

पुस १५ गते दोस्रो पटक महेन्द्रनगर पुगेका आइजिपी सर्बेन्द्र खनालसँग निर्मलाकी आमा र स्थानीयहरूले पनि स्वाव पुष्टि गर्न माग गरेका थिए ।

उनीहरूकै माग अनुसार प्रहरीले गत सातादेखि निर्मलाका आमा–बुवा दुवैको रगतको नमूना सङ्कलन गर्न प्रयास गरेको थियो ।

यज्ञराज पन्तले रगत दिन नमानेपछि प्रहरीले पुस २५ गते दुर्गाले छोरी निर्मलाकै डिएनए हो वा होइन एकिन गर्न रगत दिएको बताइन् । प्रहरीले निर्मलाकै स्वाव परीक्षणका लागि पठाएको दावी गरेपछि एकिन गर्न दुर्गाले रगत दिएकी हुन् ।

जिल्ला प्रहरी कार्यालय कञ्चनपुरमा दुर्गाले लिखित निवेदन दिएपछि प्रहरीले उनको रगतको नमूना लिएको हो ।

महाकाली अञ्चल अस्पतालको प्रयोगशालाबाट प्रहरीले दुर्गाको रगत नमूना सङ्कलन गरेको छ । शङ्का हटाउन छोरीसँगको डिएनए म्याच गराउन रगतको नमूना दिएको दुर्गाले बताइन् ।

जिल्ला प्रहरी कार्यालयले सङ्कलन गरिएको रगतको नमूना पुस २६ गते राष्ट्रिय विधि विज्ञान प्रयोगशाला काठमाडौँ पठाउने जनाएको छ ।

जिल्ला प्रहरी कार्यालयका एसपी कुवेरसिंह कडायतले निर्मलाकी आमाबाट सङ्कलन गरिएको नमूना म्याचका लागि पठाइने बताए । निर्मलाको बलात्कारपछि हत्या भएको ५ महिना बितिसक्दा पनि अझै अपराधि पत्ता लागेको छैन ।


कोमलनिरन्जन भाट