निर्दोषलाई दोषी बनाउने गरी बयान दिएको घटनाका आरोपित गिरफ्तार

  ०७६ कात्तिक २१ गते

१३ वर्षीया बालिकालाई बलात्कार गरेको भनी १६ वर्षीय बालकविरूद्ध अदालत समक्ष झुटो बयान (बकपत्र) दिएको आरोपमा प्रहरीले तीन जनालाई गिरफ्तार गरेको छ ।

प्रहरीले म्याङलुङ नपा–४ की ५२ वर्षीया गिरीराज खत्री, ४२ वर्षीया सावित्रा खत्री र ३२ वर्षीया चन्द्रमाया खत्रीलाई कात्तिक २० गते गिरफ्तार गरेको जिल्ला प्रहरी कार्यालयका डिएसपी नविनकिशोर प्रधानले बताए ।

पीडित बालिकालाई आरोपित बालकले ०६८ असोज १२ गते बलात्कार गरेको आरोपमा पीडित पक्षले प्रहरीमा उजुरी गरेपनि अदालतमा पीडितलाई प्रतिकुल हुने गरी बकपत्र गरेको भन्दै पुनरावेदन अदालतका न्यायधीश बलराम विष्ट र केदार पौडेलले ०७१ माघ १३ गते जाहेरीवालालाई जनही ३-३ महिना कैद फैसला गरेकोमा सर्वोच्च अदालतले ०७५ मङ्सिर २ गते पुनरावेदन अदालतको फैसलालाई सदर गरेपछि फरार रहेका झुटो बकपत्र गर्नेलाई गिरफ्तार गरेको डिएसपी प्रधानले बताए ।

बलात्कार अभियोग लागेका आरोपितलाई जिल्ला अदालतका न्यायधीश मात्रिकाप्रसाद कोइरालाले ०७१ जेठ २५ गते १२ वर्ष कैद सजाय फैसला गरेका थिए ।

फैसलापछि फरार रहेका प्रतिवादीलाई ०७४ चैत १३ गते प्रहरीले गिरफ्तार गरि कारागार चलान गरेको थियो । झुटो बकपत्रका आधारमा सजाय पाएका आरोपितले अहिले कैद भुक्तान गरिरहेका छन् ।

सरकारी मुद्दासम्बन्धी ऐन, २०४९ को दफा २८ ‘क’ मा झुटो बकपत्रका आधारमा निर्दोषलाई सजाय दिलाउन नहुने उल्लेख छ ।

बयान दिनेहरूले सोही ऐनको दफा २८ उल्लङ्घन गरेको कसुरमा गिरफ्तार गरी कानुनी कारवाही अघि बढाएको प्रहरीले जनाएको छ । पीडित बालिकाको स्वास्थ्य परीक्षण जिल्ला अस्पतालमा ०६८ असोज १२ गते गरिएको थियो ।


भगिश्वर लिम्बू