नापी कार्यालयमा शक्तिशाली बम विष्फोट

  ०७४ वैशाख २९ गते

राजविराज नपा-८ स्थित नापी कार्यालयमा वैशाख २९ गते दिउँसो चार बजे शक्तिशाली बम विष्फोट भएको छ ।

कार्यालय बन्द रहेको समयमा कार्यालयस्थित ग्यारेजमा गराइएको कुकर बम विष्फोटको जिम्मेवारी जयकृष्ण गोइत नेतृत्वको अखिल तराई जनतान्त्रिक मुक्ति मोर्चा (क्रान्तिकारी)ले लिएको छ ।

विष्फोटबाट मानवीय क्षति नभएपनि ग्यारेजमा रहेको साइकल क्षतिग्रस्त भएको जिल्ला प्रहरी कार्यालयका एसपी अनुराग द्विवेदीले जानकारी दिए ।

सुरक्षा समितिको वैशाख २८ गतेको बैठकले प्रत्येक कार्यालय र सम्वेदनशील क्षेत्रमा सुरक्षाकर्मीहरूलाई पालो पहरा दिने निर्णय अनुरूप सुरक्षाकर्मीलाई खटाइए पनि सशस्त्र समूहले मौका छोपेर बम विष्फोट गराएको बताउँदै एसपी द्विवेदीले सुरक्षा व्यवस्थालाई कडा बनाइएको बताए ।

यसअघि राजविराजमा फेला परेका बमहरू नेपाली सेनाको टोलीले निष्क्रृय पार्दै आएकोमा वैशाख २९ गते दिउँसो ठूलो आवाजका साथ शक्तिशाली बम विष्फोट भएपछि व्यापारी तथा नगरबासी आतङ्कित बनेका छन् ।

कार्यालय, विद्यालय, घर र पसलहरूमा समेत बम राख्ने गरेको पाइएपछि सदरमुकाम राजविराजका लागि सुरक्षा चुनौती थपिँदै आएको छ ।


मनोहरकुमार पोखरेल