समाचारहरू

कनकासुन्दरी गाउँपालिकाले नक्कली ओखरको बिरूवा वितरण गरेको भन्दै कृषकले क्षतिपूर्तिको माग गरेका छन् ।

जुम्लामै ग्राफ्टिङ गरेर उत्पादन गरेको दाँते ओखरको बिरूवा वितरण गर्नुपर्नेमा गाउँपालिकाले टेन्डर मार्फत खरिद गरेको तर ग्राफ्टिङ नगरेको ओखरको बिरूवा वितरण गरेको पुष्टि भएपछि कृषकले क्षतिपूर्तिको माग गरेका हुन् ।

ठेकेदार र कृषि शाखाको मिलेमतोमा ग्राफ्टिङ नगरेका नक्कली ओखरका बिरूवा किनेर किसानलाई ठगेको कनकासुन्दरी–४ लेकपरका किसान पुन्न बुढाले गुनासो गर्नुभयो ।

उहाँले भन्नुभयो ‘ग्राफ्टिङ नगरिएको बिरूवा वितरण भएको हल्लापछि कृषि विज्ञ ल्याएर समेत बिरूवा जाँच गरियो । जाँच गरिएका ६ वटा बिरूवा मध्ये ४ वटा शङ्कास्पद भेटिए ।’

गाउँपालिकाले चालु आर्थिक वर्षमा १९ लाख लागतको ओखर प्रवद्धन कार्यक्रम अन्तर्गत स्थानीय लालबहादुर जिसीको कनका सुन्दरी एग्रो हबबाट बिरूवा खरिद गरेको थियो ।

वितरण गरिएका २ हजार ९ सय बिरूवामध्ये अधिकांश बिरूवा ग्राफ्टिङ नै नभएका गुनासो आएपछि कनकासुन्दरी एग्रो हब प्रालीका सञ्चालक जिसीले  नर्सरी धनीबाटै बेइमानी भएको बताउनुभयो । ‘२९  सय बिरूवा मध्ये साढे १३ सय बिरूवा मात्रै जुम्ली बिरूवा छन् भने बाँकी १७ सय जुम्ली भनेर कास्मिरी दिइयो’ जिसीले भन्नुभयो ।

नर्सरी धनी हंश बस्नेतका नाममा मुद्धा हाल्ने र कानुनी कारबाहीका लागि अघि बढ्ने कनकासुन्दरी गाउँपालिकाका अध्यक्ष नरबीर रावतको भनाई छ ।
यता नर्सरी धनी तिला गाउँपालिका–८ का हंश बस्नेतले आफूले बैतडीमा रहेको पुर्चौउली एग्रो हबका निर्देशक दिपक धानुसँग बिरूवा ल्याएको बताउनुभयो ।

ओखर लगाउनका लागि खाल्डा खनेको, मल, पानी तथा श्रमको क्षतिपूर्ति तत्काल पाउनुपर्ने कृषकको माग रहेको छ । किसान जङ्गबहादुर घर्तीले भन्नुहुन्छ ‘रोपेको बिरूवा नक्कली भएपछि उखेल्नुको विकल्प छैन । ओखर खेतीका लागि हाम्रो मेहनत र लगानी खेर गयो । हामीले क्षतिपूर्ति पाउनुपर्छ ।’

कृषकले ७५ प्रतिशत अनुदानमा बिरुवा पाउँदा व्यक्तिलाई प्रति बिरूवा २ सय र समूहलाई ८ सयका दरले वितरण गरिएको छ । किसानले बिरूवा खरिदमा व्यहोरेको २५ प्रतिशत रकम सहित आवश्यक क्षतिपूर्ति तत्काल पाउनुपर्ने अर्का कृषक भुपेन्द्र मल्लको माग छ ।

मानदत्त रावल