समाचारहरू

धनुषाको नगराइन नगरपालिका–६ बस्ने ७ वर्षीय चन्दनकुमार दासलाई महोत्तरीको पिपरा गाउँपालिका–७ घर भई हाल जनकपुरधाम उपमहानगरपालिका–७ कटैयाचौरीमा डेरामा बस्दै आएका २० वर्षीय मामा राम रतन दास भन्ने लक्ष्मेश्वरकुमार दासले फागुन ८ गते दिउँसो १ बजे अपहरण गरेको जिल्ला प्रहरी कार्यालय धनुषाका एसपी प्रकाश रानाभाटले बताउनुभएको छ ।

फागुन ८ गते दिउँसो घरैबाट बालकलाई अपहरण गरेको र फोनमा १ करोड रुपियाँ फिरौती माग भएको भनी अपहरित बालकका बुबा रमेश दासले फागुन ८ गते दिउँसो १ः१५ बजे सिमा सशस्त्र प्रहरी चौकी जटहीमा खबर गर्नुभएको थियो ।

बालक अपहरण भएको र फिरौतीको लागि फोनमा १ करोड माग गरिएको सूचना पाएपछि प्रहरीले बालकको खोजी गरेको थियो ।

सशस्त्र प्रहरी, जिल्ला प्रहरी कार्यालय धनुषा, प्रदेश प्रहरीलगायतको टिमले बालकको खोजी गर्ने क्रममा फागुन ८ गते साँझ ८ बजे अपहरित बालकका मामा लक्ष्मेश्वरकुमार दासलाई जनकपुरधाम¬ उमनपा–७ स्थित डेरामा बालकलाई बन्धक बनाई राखेको अवस्थामा बालकलाई सकुशल उद्धार गरेका हुन् ।

जिल्ला प्रहरी कार्यालय धनुषाले फागुन ९ गते दिउँसो पत्रकार सम्मेलनको आयोजना गरी सकुशल उद्धार गरिएका बालक र अपहरणकर्ता मामालाई सार्वजनिक गरेको छ ।

आरोपित दासले चन्दनलाई नगराइन नगरपालिका–६ लग्मास्थित उनकै घरबाटबाट शनिबार दिउँसो १ बजे अपहरण गरेको प्रहरीसमक्ष स्वीकार गरेको जिल्ला प्रहरी कार्यालय धनुषाका डिएसपी मकेन्द्रकुमार मिश्रले बताए ।

दासविरुद्ध जिल्ला प्रहरी कार्यालय धनुषामा अपहरित बालकका बुबा रमेश दासले शरीर बन्धक तथा अपहरण शीर्षकमा उजुरी दिएको धनुषाका एसपी रानाभाटले बताउनुभयो ।

दिपेन्द्रप्रसाद सिंह