समाचारहरू

बैतडीमा गत आर्थिक वर्षमा द्वन्द्वपीडितका लागि आएको ९ करोड ८२ लाख ५० हजार रुपियाँमध्ये ३ करोड ५७ लाख ७५ हजार ३ सय रुपियाँ फ्रिज भएको छ । ढिलो गरी अख्तियारी प्राप्त भएको र बीचमा स्थानीय तहको निर्वाचन भएकाले समयमै द्वन्द्वपीडितलाई रकम वितरण गर्न नसक्दा फ्रिज भएको जिल्ला प्रशासन कार्यालयले जनाएको छ ।

असारमा मात्रै अख्तियारी आएकाले सबै रकम वितरण हुन नसकेको जिल्ला प्रशासन कार्यालयका लेखापाल गोविन्द रावलले बताए । द्वन्द्वका बेला बैतडीमा १ सय ७१ जनाको मृत्यु भएकोमा ८१ जना सर्वसाधारण मृतकका परिवारले ५ लाख रुपियाँका दरले र ६१ जना सेना प्रहरीका मृतक परिवारले १ लाख ५० हजारका दरले राहत रकम पाएको उनले बताए ।

यस्तै बेपत्ता पारिएका २७ जनामध्ये २५ जनाका परिवारले ५ लाखका दरले राहत रकम पाएका छन् । यसैगरी विस्थापित ३ सय ३६ जनामध्ये २९ जनाले २५ हजार रुपियाँका दरले राहत रकम प्राप्त गरेको जिल्ला प्रशासन कार्यालयले जनाएको छ ।

सशस्त्र द्वन्द्वका बेला बैतडीमा १ सय ७१ जनाले ज्यान गुमाएका छन् भने २५ जना बेपत्ता पारिएका छन् । ३ सय ५० परिवार विस्थापित भएको स्थानीय शान्ति समितिसँग तथ्याङ्क रहेको छ ।

नरी बडु