दुई दिनदेखि जिल्ला अस्पताल गरिएको तालाबन्दीले बिरामीलाई सास्ती

  ०७५ चैत २७ गते

हिमाली जिल्ला हुम्लामा रहेको एक मात्र अस्पतालमा चैत २६ गतेदेखि चिकित्सकहरूले नै सम्पुर्ण सेवाहरू ठप्प पारेपछि बिरामीलाई सास्ती भएको छ ।

देशभरका सरकारी चिकित्सकहरूको आन्दोलनका कारण हुम्लामा पनि जिल्ला अस्पतालका सम्पुर्ण सेवा बन्द गरिएको जिल्ला अस्पतालका निमित्त कार्यालय प्रमुख डाक्टर टसी लामले बताए ।

डाक्टर लामाका अनुसार इमरजेन्सी सेवा बाहेकका अन्य सम्पुर्ण कार्यालय सहित सेवाहरु बन्द भएको बताए ।

देशभरको स्वास्थ्य सेवालाई नै असर पर्ने गरी सरकारी चिकित्सकले गरेको आन्दोलनका कारण अस्पताल आएका बिरामी उपचार नपाएर प्रभावित भएका हुन् ।

सरकारी चिकित्सक आन्दोलनका कारण सर्वसाधरण मारमा परेका छन् । गाउँबाट जिल्ला अस्पताल पुग्न एक दुई दिनको पैदल हिँडेर उपचार गराउन आएता पनि उपचार हुन नसकेको जिल्ला अस्पतालमा भेटिएका समराज बोहराले गुनासो गरे ।

सामान्य रुघा खोकिको औषधिको लागि पनि बिरामीले निकै सास्ती खेप्नुपरेको स्थानीय भक्तराज ऐडीले दुखेसो पोखेका छन् ।

जिल्ला अस्पतालमा उपचारको लागि पुगेका ऐडीका अनुसार सरकारी चिकित्सकहरूको आन्दोलनले तीन दिनको पैदल हिँडेर जिल्ला अस्पताल पुगेका बिरामीलाई निकै समस्या भएको छ ।

अस्पतालमा ताला बन्दीका कारण हुम्लाका ४५ देखि ५० जना भन्दा बढी बिरामी उपचार गराउन आउने भएता पनि अस्पतालले इमरजेन्सी बाहेकका सम्पुर्ण सेवा ठप्प पारेपछि गाउँबाट आएका बिरामीलाई उपचार गर्न समस्या भएको पत्रकार लोग भण्डारीले बताए ।


नन्द सिंह