दार्चुलामा निर्वाचन आचारसंहिता उल्लंघन बढ्यो

  ०७४ जेठ ३० गते

सदरमुकाम खलंगासहित अधिकांश गाउँपालिका र नगरपालिकामा ठूला तीन राजनीतिक दलले आचारसंहिता उल्लंघन गरेका छन् । जिल्लामा नेपाली काङ्ग्रेस, नेकपा एमाले, नेकपा माओवादी केन्द्रसहित पार्टीका कार्यकर्ता र उम्मेदवारले निर्वाचन आचारसंहिता उल्लङ्घन गरेका हुन् ।

राजनीतिक दलले मुख्य चोक, सडक क्षेत्र र सार्वजनिक स्थलहरूमा पार्टीका झण्डा र ठूलाठूला व्यानर पोष्टर राखेको पाइएको छ । पछिल्लो समय, महाकाली नगरपालिका, शैल्यशिखर नगरपालिका, मालिकार्जुन गाउँपालिका, दुहु गाउँपालिका, नौगाड गाउँपालिका, मार्मा गाउँपालिका र अपि हिमाल गाउँपालिकामा आचारसंहिता उल्लङ्घन बढेको हो ।

निर्वाचन आयोगद्वारा आचारसंहितामा दुई दिनअघि राजनीतिक दललाई चुनावी चिन्ह भएको टिसर्ट वितरण गर्न हुँदैन । यस्तै जिल्ला प्रशासन कार्यालय दार्चुलाले पनि जिल्लास्थित सबै राजनीतिक दलहरूलाई आचारसंहिता पालना गर्नु भनेर परिपत्र गरेको छ । तर, यसलाई लत्याउँदै अहिले जिल्लामा क्रियाशील राजनीतिक दलले चुनाव चिन्ह भएको टिसर्टहरू व्यापक वितरण गरेको पाइएको छ ।

यस्तै राजनीतिक दलले चुनावी आचारसंहिता उल्लङ्घन गर्दै प्रचारप्रसार समेत भडि्कलो बनाएका छन् । नगरपालिका क्षेत्रमा तोकिएको भन्दा बढि सवारी साधन प्रयोग भइरहेको छ । उम्मेदवारहरूले चार पाङ्ग्रे गाडीहरूको प्रयोगसमेत बढाएका छन् ।

स्थानीय गौरसिंह महराका अनुसार राजनीतिक दलहरूले बालबालिकालाई समेत चुनाव चिन्ह अङ्कित आफ्नो फोटोसमेत भएका टिसर्ट वितरण गरेका छन् ।

मुख्य निर्वाचन अधिकृतको कार्यालय दार्चुलाका अनुसार हालसम्म ६ ओटा लिखित तथा १५/१६ ओटा मौखिक रूपमा निर्वाचन आचारसंहिता उल्लङ्घन गरेको उजुरी परेको आचारसंहिता अनुगमन अधिकृत निरञ्जन स्थापितले जानकारी दिए ।

'मौखिक रूपमा परेको उजुरीको मौखिक रूपमै सचेत पार्ने काम भएको छ ।'-उनले भने-'लिखित रूपमा आएका उजुरी माथि छानबिन गर्ने काम भइरहेको छ ।'

खासगरी दार्चुलामा विद्यालय प्रयोग गरी कार्यक्रम भइरहेको, सार्वजनिक स्थल प्रयोग गरेको, विकास निर्माणको काम उद्घाटन गरेको जस्ता उजुरी परेका छन् । लिखित उजुरीको लिखित रूपमै स्पष्टीकरण माग गरिएको बताइएको छ । केहीले लिखित रूपमा स्पष्टीकरण पेश गरिसकेको स्थापितले बताए ।

यसैबीच जेठ ३० गते नेकपा माओवादी केन्द्रले मार्मा गाउँपालिकामा विद्यालय प्रयोग गर्दै चुनावी आमसभा गरेको छ ।

मार्मा गाउँपालिकाको दुर्गा निमावि च्युरानीमा चुनावी आमसभा गरेको हो । मार्मा गाउँपालिका अध्यक्ष जमनसिंह धामीको उपस्थितिमा चुनावी आमसभा भएको छ । पटकपटक विद्यालय प्रयोग नगर्न परिपत्र भएपनि अझै पनि राजनीतिक दलहरूले चुनावी सभा विद्यालयमै गर्ने गरेका छन् ।


नरेन्द्रसिंह कार्की