दाइजो माग्दै घरेलु हिंसा गरेको आरोपमा उजुरी दर्ता

०७५ फागुन १६ गते

कङ्कालिनी नपा–१४ रम्पुरा मल्हनियाकी २१ वर्षीया रोजीतन खातुनलाई २५ वर्षीय पति हनिफा मियाँ, ५२ वर्षीय ससुरा सहमद मियाँ, ५२ वर्षीया सासू बतुलन खातुन र २२ वर्षीय देवर इसाद मियाँले थप दाइजो मागी घरनिकाला गरेको भन्दै पीडितले जिल्ला अदालत सप्तरीमा फागुन १४ गते घरेलु हिंसाको उजुरी दर्ता गराएकी छिन् ।

मुस्लिम धर्मअनुसार ०७२ वैशाख २५ गते मागी विवाह हुँदा दाइजोस्वरुप ५ लाख रुपियाँ नगदसहित गरगहना र फर्निचरहरू दिए पनि चार चक्के गाडीका लागि १३ लाख रुपियाँ थप दाइजो माग गरी आरोपितहरूले गत पुस २५ गते घर निकाला गरेको पीडितले बताइन् ।

घरबाट निकालिएकी पीडित सुनसरीको कोशी गाउँपालिका–८ स्थित माइतीघरमा बस्दै आएकी छन् । विवाह दर्ता र नागरिकता समेत नबनाई दिएका आरोपित पतिले अप्राकृतिक मैथुन गरी चरम यातना दिने गरेको समेत पीडितले आरोप लगाइन् ।


मनोहरकुमार पोखरेल