दाइजो नल्याएको आरोपमा हत्या गरेको माइती पक्षको आरोप

  ०७६ जेठ ९ गते

दाइजो नल्याएको आरोपमा जानकी गाउँपालिका–३ की २१ वर्षीया निरा बर्माको हत्या गरेको आरोपमा माइती पक्षले २५ वर्षीय पति राममनोहर कुर्मीलाई कारवाही गर्न माग गरेको छ ।

मृतकका माइती पक्षले जेठ ९ गते नेपालगञ्जमा पत्रकार सम्मेलन गर्दै ‘ज्वाँइ’ले छोरीको हत्या गरेको आरोप लगाएको छ ।

मृतकका बुबा राधेश्याम कुर्मीले १ लाख रुपियाँ र मोटरसाइकल दाइजो नल्याएको भन्दै छोरीको हत्या गरेको दावी गरेका थिए ।

०७२ वैशाखमा विवाह भई ०७५ वैशाखमा गौनाथौना गरी पतिसँग बस्दै आएकी निरा बर्मा जेठ २ गते घरमै झुण्डिएको अवस्थामा फेला परेकी थिइन् ।

‘ज्वाँइले १ लाख रकम र मोटरसाइकल ल्याउन दबाब दिइरहेको र बेलाबेला छोरीलाई कुटपिट गरिरहन्थे ।’–राधेश्यामले भने ।

पीडित पक्षले हत्यामा अरुको पनि संलग्नता हुन सक्ने भन्दै घटनाको अनुसन्धान गरी दोषीलाई कारवाहीको माग गरेका छन् ।

दाइजोमा १ लाख रुपियाँ र मोटरसाइकल नदिएको आरोपमा  शारीरिक र मानसिक यातना दिएको छोरीले बताएपछि माइती पक्षले वैशाख १७ गते जिल्ला प्रहरी कार्यालय बाँकेको महिला तथा बालबालिका सेवा केन्द्र उजुरी दिएको थियो ।

राममनोहर कुर्मीले छोरीसँग झैझगडा नगर्ने प्रतिवद्धता जनाएर मिलापत्र भएको राधेश्यामले बताए । मृतक पक्षले हत्या गरेको भन्दै जेठ ३ गते जिल्ला प्रहरी कार्यालयमा उजुरी दिएको थियो । शवको पोष्टमार्टम जेठ ३ गते भेरी प्रादेशिक अस्पताल नेपालगन्जमा गरिएको थियो ।

जिल्ला प्रहरी कार्यालयले आरोपित राम मनोहरलाई जेठ ३ गते गिरफ्तार गरी अनुसन्धान भइरहेको एसपी अरुण पौडेलले बताए ।


स्मृति देवकोटा