समाचारहरू

खार्पुनाथ गाउँपालिकाका जनप्रतिनिधि कार्यालय सहयोगीको भरमा दिनहुँ तुइन तर्न बाध्य छन् । तर सहयोगिको अभावमा स्थानीयलाई भने वारपार गर्न समस्या भएको छ ।

खार्पुनाथ गाउँपालिका–५ याङ्चुमा  गाउँपालिकाको कार्यालय, स्वास्थ्य सेवा चौकी, जनता बैँक, लगायतका कार्यालयमा छन् । वडा नम्बर २ को छिप्रा ३ नम्बरको थाली, राया, काराङ्ग र ४ नम्बरको हिप्रो गाउँका करिब १५ सय जनताले विभिन्न सेवा दिनको लागि तुइनमार्फत कर्णाली पार गरी याङ्चु जानुपर्ने स्थानीय दलबहादुर शाहीले बताउनुभयो ।

आफू स्वास्थ्य सेवा लिन जानेक्रममा कष्टपूूर्ण रूपमा तुइनको यात्रा गर्नु पर्ने बाध्यता रहेको खार्पुनाथ गाउँपालिका–३ की हस्ता बुढाले गुनासो गर्नुभयो ।

गाउँपालिकामा जाँदा आउँदा तुइन तर्ने क्रममा हातका औँलाहरूमा क्षति पुग्ने खार्पुनाथ गाउँपालिका–२ का स्थानीय बैचन्द छत्यालले बताउनुभयो । उहाँका अनुसार तुइनमा तराउने व्यक्ति नभएपछि २ देखि ३ घण्टा लगाएर खार्पु दोभानको पुल प्रयोग गरेर गाउँपालिका कार्यालय पुग्नु पर्ने बाध्यता रहेको छ ।

गाउँपालिकाले १४ लाख ७४ हजार ७१ रूपियाँमा ०७७ साउन १ गते तुइन निर्माण गरेको थियो । गाउँपालिका कार्यालयको काममा ०७७ असोज ५ गते जाँदा तुइनले आफ्नो दाइने हातको कान्छि औँलाको आधा भाग काटेको छत्यालले दुःखेसो पोख्नु भयो ।

त्यस्तै तुइनमा वारपार गर्दा छोरीको हात काटीएको खार्पुनाथ गाउँपालिका–३ कि धना शाहीले गुनासो गर्नु भयो । त्यसैगरी याङ्चु प्रहरी चौकीमा कार्यरत एक जना प्रहरीको पनि हात काटीएको खार्पुनाथ गाउँपालिकाका उपाध्यक्ष रूपा शाहीले उल्लेख गर्नुभयो ।

तुइनको प्रयोग गर्दा धेरै क्षति भएपछि स्थानीयहरूले गाउँपालिकासँग तुइन वारपार गराउने व्यक्तिको व्यवस्था गर्नुपर्ने माग राख्दै आएको खार्पुनाथ गाउँपालिका–४ छिप्राका रामबहादुर हमालले बताउनु भयो ।

तुइन सञ्चालनमा आएपनि बजेट अभावका कारण वारपारका लागि चौकीदार राख्न नसकिने गाउँपालिकाका अध्यक्ष कर्ण रावलले बताउनुभयो ।

सोही ठाउँको बोक्च्या गौँडामा १ लाख ४१ हजारको लागतमा ०७६ कात्तिक १० गते निर्माण भएको तुइन भने हाल बेवारीसे अवस्थामा रहेको छ । उक्त तुइनको डोरी बाहेक अन्य सामग्री कसले लियो त्यसबारे गाउँपालिका कार्यालय बेखवर छ ।

‘पटक पटक तुइनको डोरी चोरी हुने भएका कारण गौंडाको तुइन हाल बन्द छ । अब नेपालगञ्जबाट चोरी गर्न नसकिने डोरीको माग गरेका छौं । त्यसपछि मात्रै तुइन नियमित सञ्चालन हुनेछ’ गाउँपालिका अध्यक्ष रावलले भन्नु भयो ।

नन्द सिंह