तीन सय ४७ जना मजदूरको प्रशासनद्वारा उद्दार

  ०७६ चैत २० गते

कोरोना भाइरस(कोभिड–१९) रोकथामका लागि सरकारले लकडाउन गरेसँगै मदन भण्डारी राजमार्गको विभिन्न खण्डमा अलपत्र परेका तीन सय ४७ जना मजदूरलाई जिल्ला प्रशासन कार्यालयले गृह मन्त्रालयसँग समन्वय गरी घर फर्काएको छ ।

राजमार्गको उदयपुर–सिन्धुली–भिमान खण्डमा कार्यरत २३ जिल्लाका मजदूरहरू विचल्लीमा परेका थिए । जेडआईईसी शर्मा लामा जेभी कम्पनी मातहतमा कार्यरत मजदूरहरू सातायता सडकमै बेवारिसे अवस्थामा रहेका थिए ।

लामा शर्मा जेभिका इञ्जिनियर सिताराम दाहालका अनुसार दाङ्ग जिल्लाका ५६ जना, कैलालीका ५३ जना, दोलखाका २३ र सल्यानका ३० जनालाई घर फर्काइएको छ ।

अलपत्र परेका मजदूरहरूलाई घरसम्म पुर्र्याउने जिम्मेवारी कम्पनीको भएकाले प्रशासनसँग समन्वय गरी घर फर्काइएको दहालले बताउनुभयो ।

जिल्ला प्रशासन कार्यालयले पास उपलब्ध गराएपछि सवारी व्यवस्था गरेर मजदूरको घर–घर पुर्र्याएको उहाँको भनाई छ ।

 

 


भरत खड्का