ताप्लेजुङ जिल्ला अस्पतालबाट निःशुल्क औषधि नपाएको सेवाग्राहीको गुनासो

  ०७६ साउन १६ गते

नेपालको संविधान भाग–३ स्वास्थ्य सम्वन्धि हक (१) मा प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भनी उल्लेख गरिएको छ ।

जिल्ला अस्पतालबाट ७० प्रकारका औषधि निःशुल्क पाउनुपर्ने हो । अझ निःशुल्क औषधिको नामसहितको विवरण नागरिक वडापत्र सेवाग्राहीले हेर्न तथा पढ्न मिल्नेगरी कार्यालयमा व्यवस्था गर्नुपर्ने प्रावधान छ ।

तर, जिल्ला अस्पतालबाट पाउनुपर्ने निःशुल्क औषधि पाउनबाट वञ्चित भएको सेवाग्राहीले गुनासो गरेका छन् ।

स्वास्थ्य चेकजाँचमा आएका सेवाग्राहीले डक्टरले पुर्जामा सिफारिस गरेको निःशुल्क औषधि अस्पतालको फार्मेसीबाट नपाएको गुनासो गरेका हुन् ।

फुङलिङ नगरपालिका–३ का दिलिप बरालले अस्पतालमा निःशुल्क औषधि फार्मेसीको कुनामा लुकाए झैँ गरी राख्ने गरेको गुनासो गरे ।

साउन १४ गते पत्नीको चेकजाँचका लागि अस्पताल पुगेका बरालले भने–“पैसा पर्ने औषधि देखिने गरी राखेको हुन्छ । तर, निःशुल्क वितरण गर्ने औषधि चाहिँ कुनामा लुकाएर राख्नु किन ?”

फुङलिङ नगरपालिका–५ का अञ्चल गुरुङले भने–“अधिकांश सेवाग्राहीलाई थाहा हुँदैन कि कुन नामको औषधि निःशुल्क हो ? सेवाग्राहीलाई सचेतना र अस्पतालले निःशुल्क औषधि वितरण गरे नगरेको अनुगमन हुनुपर्छ ।”

जिल्ला स्वास्थ्य कार्यालयको गोदाममा औषधि त प्रशस्त छ, तर गोदामबाट अस्पतालको वितरण केन्द्रसम्म ल्याउने जनशक्ति नहु“दा समस्या भएको छ ।

अस्पतालका कार्यालय सहयोगी लगायतको जनशक्ति कर्मचारी समायोजनमा नगरपालिकातिर गएपछि र अस्पतालमा कामगर्ने जनशक्ति नभएपछि समस्या भएको स्टोरको जिम्मेवारी लिएका डम्बर श्रेष्ठले बताए ।

श्रेष्ठले भने–“प्रदेशको आपूर्ति विभागले पनि औषधि छ की छैन भनेर सोधेको थियो । सङ्घ र स्थानीय स्तरमा हुनुपर्ने औषधि पनि छ भन्यौ । तर, वितरण समस्या छ ।”

जनस्वास्थ्यको गोदामवाट अस्पतालसम्म ल्याउने जनशक्तिको अभावले व्यवस्थापनमा कठिनाइ भएको उनले बताए ।

उजुरी र मुद्दामामला जस्ता कारण समयमा खरिद गर्न नसकेकाले अस्पतालको फार्मेसीमा प्रशस्त औषधि हुन नसकेको अस्पतालले जनाएको छ ।

अस्पतालका मेडिकल सुपरिटेण्डेण्ट डाक्टर सोनिम लामाले आफू बिरामी भएकाले बेड रेष्टका लागि बसेको र निको भएपश्चात निःशुल्क औषधि वितरणमा समस्या नहुने बताए ।


देवराज गुरुङ