डोल्पाका ग्रामीण क्षेत्रमा खाद्यान्न सङ्कट

  ०७६ साउन २९ गते

हिमाली जिल्ला डोल्पाको मुड्केचुला गाउँपालिका र से-फोक्सुण्डो गाउँपालिकामा खाद्यान्न सङ्कट भएको छ ।

मुड्केचुला गाउँपालिकामा पर्ने कालिका, इलनिल दह, सर्मिगाउँ र से-फोक्सुण्डो गाउँपालिकाका फोक्सुण्डो, भिजेर, पुग्मो, साल्दाङलगायतका बस्तीहरूमा खाद्य सङ्कट भएको स्थानीयले गुनासो गरे ।

वर्षात् लागेसँगै कालिका जाने मुलबाटोलगायत आवतजावत गर्ने काशिंला खोलामाथिको पुल बाढीले बगाएपछि ढुवानीमा समस्या आएकाले खाद्यान्न सङ्कट भएको मुड्केचुला गाउँपालिका-१ का अध्यक्ष भानुभक्त बोहराले बताए ।

असारको पहिलो हप्ता देखि गाउँपालिकामा खाद्यान्न सङ्कट भएको बताउँदै बोहराले नेपाल खाद्य संस्थान, डोल्पा शाखालाई पटकपटक खाद्यान्न आपुर्ति गरिदिन परिपत्र गरेपनि नपठाएको गुनासो गरे ।

मुड्केचुला गाउँपालिकाको लागि आर्थिक वर्ष०७५/०७६ का लागि ३ हजार क्वीन्टल चामल विनियोजन भई आपुर्ति र वितरण समेत भइसकेको र नयाँ आर्थिक वर्षको लागि भर्खरै मात्र टेण्डर खोलेकाले भदौको दोस्रो हप्ता भित्रमा चामल सम्बन्धित बस्तीमा पुग्ने नेपाल खाद्य संस्थान, डोल्पा शाखा प्रमुख कमलराज पाण्डेले बताए ।

से-फोक्सुण्डो गाउँपालिकामा पनि नेपाल खाद्य संस्थानले उपलब्ध गराउने चामल र नुन एक वर्षदेखि नपाएको स्थानीय पेम्बा लामाले बताए ।

नेपाल खाद्य संस्थानले ढुवानी अनुदानमा उपलब्ध गराउने चामल नपाएपछि बजारमा पाइने महङ्गो चामल किनेर खान बाध्य भएको लामाको भनाई छ ।

उत्तरी सिमा नाकामा पर्ने से-फोक्सुण्डो गाउँपालिकालगायत डोल्पोबुद्ध र छार्काताङसोङ गाउँपालिकामा काठमाडौँबाट ल्हासा हुँदै तिब्बत भएर डोल्पामा चामल पुर्‍याउने गरिन्छ ।

तर, गएको आर्थिक वर्षको चामल पठाइएको भएपनि तिब्बती र डोल्पाको सिमानाका पर्ने मोरिम र क्याटो नाका वर्षमा एक पटक यार्साको सिजनमा मात्र खुल्ने भएकाले ढुवानीमा ढिला भएको नेपाल खाद्य संस्थानले जनाएको छ ।

उपल्लो डोल्पाका तीन गाउँपालिकाका जनताका लागि ६ हजार क्वीन्टल चामल र नुन काठमाडौँबाट तिब्बत हुँदै डोल्पाको लागि पठाईसकेकाले भदौ १ देखि १० गतेसम्म स्थानीयले खाद्यान्न किन्न पाउने पनि शाखा प्रमुख पाण्डेले बताए ।

हरेक वर्षभदौ १ गतेदेखि १५ दिनसम्म बहुमुल्य जडिबुटी यार्सागुम्बाको व्यापारको लागि उपल्लो डोल्पा र तिब्बत सिमा नाकामा पर्ने क्याटो र मोरिम नाका तिब्बतले खुला गर्ने हुँदा सोही समयमा स्थानीयले आफूहरूलाई चाहिने दैनिक उपभोग्य सामग्री खरिद गरेर वर्षदिनको लागि मौज्दात गरेर राख्ने गर्छन् ।


विष्णुप्रसाद देवकोटा