समाचारहरू

मन्त्री परिषदको माघ १४ गते बसेको बैठकले पर्साको ठोरी गाउँपालिकाको सेवा केन्द्र सार्ने निर्णयको विरोधमा स्थानीयले गाउँपालिकाको कार्यालयमा तालाबन्दी गरेका छन् ।

सुवर्णपुरमा रहेको गाउँपालिका कार्यालयमा माघ १७ गतेदेखि स्थानीयले तालाबन्दी गरेका हुन् । सूचना तथा सञ्चार प्रविधि मन्त्रालयले प्रेस विज्ञप्ति जारी गर्दै केन्द्र सारिएको जानकारी गराएपछि स्वस्फूर्त रूपमा स्थानीयले कार्यालयमा तालाबन्दी गरेका हुन् ।

०७४ माघ १५ गते भएको ठोरी गाउँपालिकाको पहिलो गाउँ सभाबाट बहुमत सदस्यको निर्णयको आधारमा गाउँपालिकाको सेवा केन्द्र ठोरी ४ को घ्याङ्डाडा सार्ने निर्णय भएको थियो ।

त्यसका विरूद्ध सुवर्णपुरमा २ महिना ५ दिन भन्दा लामो समय आन्दोलन भएको थियो । सेवा केन्द्र परिवर्तनको निर्णय सार्वजनिक भएलगत्तै सुवर्णपुरबासीहरू पुनः आन्दोलित भएका छन् । स्वतस्फूर्त सुवर्णपुर चोकमा भेला भएका स्थानीयले विरोध गरिरहेका छन् ।

गाउँपालिका कार्यालय अघि भेला भएका स्थानीयले निर्णय सच्याउनुपर्ने भन्दै विरोध प्रदर्शन गरिरहेको विमल प्रधानले जानकारी दिएका छन् ।

उनका अनुसार विरोधमा उत्रिएका स्थानीयले गाउँपालिका कार्यालयमा तालाबन्दी समेत गरेका छन् । गाउँपालिका कार्यालयमा भएको तालाबन्दीका कारण महत्वपूर्ण कामहरू प्रभावित भएको गाउँपालिकाका अध्यक्ष पिएल श्रेष्ठले बताए ।

केसी लामिछाने