समाचारहरू

ज्येष्ठ नागरिकको मानव अधिकारको वर्तमान अवस्था र सरोकारवालाहरूको भूमिका विषयमा ०७७ चैत १३ गते हेटौँडामा अन्तरक्रिया सम्पन्न भएको छ ।

राष्ट्रिय मानव अधिकार आयोग बागमती प्रदेश कार्यालयको आयोजना तथा जिल्ला ज्येष्ठ नागरिक कल्याण समितिको समन्वयमा जिल्लाका सरोकारवालासँग जेष्ठ नागरिकको अवस्थाबारे अन्तरक्रिया गरिएको हो ।

कार्यक्रममा आयोगकी ज्येष्ठ नागरिक फोकल पर्सन कल्पना आचार्यले जिल्लामा सञ्चालित पाँचओटा बृद्धाश्रमको निरिक्षण तथा अनुगमन गरिएको र सोको अवस्थाबारे प्रतिवेदन तयार पारी सरकारलाई बुझाउने बताउनुभयो ।

जिल्लामा सञ्चालित अधिकांश बृद्धाश्रमहरू सरकारको मापदण्ड अनुसार नरहेको र केही मात्र बृद्धाश्रमहरू राम्रोसँग सञ्चालन भएको पनि आचार्यले जानकारी दिनुभयो ।

कार्यक्रमका अतिथि प्रमुख जिल्ला अधिकारी गोविन्दप्रसाद रिजालले ज्येष्ठ नागरिकको अधिकार सुनिश्चितताको लागि सबै पक्षले सहयोगी भूमिका खेल्नुपर्ने बताउनुभयो ।

कार्यक्रममा इन्सेक बागमती प्रदेश कार्यालयका प्रमुख कृष्ण गौतमले ज्येष्ठ नागरिकको अधिकारमूखी अवधारणाबाट अघि बढ्नुपर्ने बताउनुभयो । सबै नागरिकले ज्येष्ठ नागरिकको विचारलाई सम्मान गर्दै राज्यका सबै निकायले दायित्व सम्झेर काम गर्न गौतमले सुझाव दिनुभयो ।

कार्यक्रममा दिव्यसेवा निकेतन बृद्धाश्रमका अध्यक्ष टिआर निरौलाले बृद्धाश्रम सञ्चालनमा प्रदेश सरकार र स्थानीय सरकारबाट सहयोग प्राप्त भएको बताउनुभयो ।

यस्तै जिल्लाका विभिन्न सहयोगी भावना भएका मानिसहरूको सहयोगबाट ज्येष्ठ नागरिकको सहयोग गर्दै आएको निरौलाले बताउनुभयो ।

यसैगरी हेटौँडा उपनगरपालिका–२ मा रहेको ओम बृद्धाश्रमका अध्यक्ष बुद्धिप्रसाद पौडेलले आश्रममा २४ पुुरुष र १० महिला बस्दै आएकोमा ज्येष्ठ नागरिकमा नागरिकताको समस्या रहेको बताउनुभयो ।

पौडेलले कानुनको समस्याले नागरिकता पाउन नसक्दा राज्यले दिएको सामाजिक सुरक्षाबाट ज्येष्ठ नगारिकहरू वञ्चित हुन परेको बताउनुभयो ।

साथै पौडेलले राज्यको तर्फबाट अक्षय कोष स्थापना भए बृद्धाश्रम सञ्चालनको लागि सहज हुने बताउनुभयो ।

यस्तै हेटौँडा उपमहानगरपालिका–१७ मा रहेको श्रीमद्भागवत् ज्ञान सञ्चार बृद्धाश्रमका अध्यक्ष तथा जिल्ला ज्येष्ठ नागरिक मञ्चका अध्यक्ष हरि सिग्देलले ज्येष्ठ नागरिकहरूलाई राज्यले प्रदान गरेको छुटहरू कार्यान्वयन हुन नसकेको बताउनुभयो ।

कार्यक्रममा पुरानो नारायणी यातायात कम्पनीका सचिव सरोज खनालले राज्यले सवारी करमा दिँदै आएको छुटमा कटौति गरेपछि सार्वजनिक सवारीमा आरक्षणको व्यवस्था हटाएको बताउनुभयो ।

उहाँले राज्यले सवारी करमा छुट गरे पुनः ज्येष्ठ नागरिक आरक्षण कोटा राख्ने बताउनुभयो । यसैगरी कम्पनीसँग रहेको एम्बुलेन्स र शवबाहन आवश्यक पर्दा उपलब्ध गराउने प्रतिबद्धता पनि व्यक्त गर्नुभयो ।

कार्यक्रममा हेटौँडा उपमहानगरपालिकाका महिला तथा सामाजिक महाशाखा प्रमुख भीम तिमल्सिनाले ज्येष्ठ नागरिकको अधिकारलाई सुनिश्चितताको लागि जेष्ठ नागरिकमैत्रि कार्यक्रमको लागि बजेट विनियोजन हुँदै आएको बताउनुभयो ।

यस्तै ज्येष्ठ नागरिकको सहजताको लागि वडा तहबाटै बृद्धभत्ता लिन सकिने गरी व्यवस्था मिलाएको तिमल्सिनाले जानकारी दिनुभयो ।

कार्यक्रममा अधिवक्ता अप्सरा बस्नेतले परिवारको डरका कारण पीडित ज्येष्ठ नागरिकले उजुरी नगर्ने गरेको पाइएको बताउनुभयो ।

जिल्ला समन्वय समिति मकवानपुरका प्रमुख रघुनाथ खुलालले जिल्ला जेष्ठ नागरिक कल्याण समितिलाई सक्रिय बनाई ज्येष्ठ नागरिकको अधिकार सुनिश्चित तथा जिल्लामा सञ्चालित बृद्धाश्रमहरू व्यवस्थित सञ्चालनको लागि निगरानी तथा सहयोग पुर्‍याउने बताउनुभयो ।

पुष्पराज अधिकारी