जिल्ला समन्वय समितिका कार्यक्रम अधिकृतमाथि आक्रमण भएको पाँच महिनामा पनि दोषि पत्ता लागेन

  ०७५ पुस २८ गते

जिल्ला समन्वय समिति रामेछापका कार्यक्रम अधिकृत नारायण सुवेदीमाथि आक्रमण भएको पाँच महिना पुग्दा पनि प्रहरीले दोषि पत्ता लगाउन सकेको छैन । जिल्लामा असुरक्षाको महसुस गरी पीडित सुवेदी अहिले विस्थापित भई काठमाडौँ बस्दै आएका छन् ।

जिल्ला समन्वय समिति रामेछापका कार्यक्रम अधिकृत मन्थली नपा–१, भैँसेसुरका ५० वर्षिय सुवेदीमाथि ०७५ भदौ ६ गते राति अपरिचित व्यक्तिले आफ्नै घरमा सुतिरहेको बेला छुरा प्रहार गरेका थिए ।

आक्रमण लगत्तै उपचारका लागि मन्थलीमा रहेको तामाकोशी सहकारी अस्पताल पुयाइएका सुवेदीलाई त्यहाँ उपचार सम्भव नभएपछि सोही राति धुलिखेल अस्पताल पुर्‍याई उपचार गरिएको थियो ।

पीडित पक्षले भदौ १० गते नै प्रहरीमा उजुरी गरेको भए पनि प्रहरीले हालसम्म दोषि पत्ता लगाउन सकेको छैन । प्रहरीले घटनाको अनुसन्धान भइरहेको जनाएको छ ।

जिल्ला प्रहरी कार्यालय रामेछापका डिएसपी अमरेन्द्रबहादुर सिंहले घटनाको बारेमा प्रहरी अनुसन्धानमा नै रहेको बताए । सो घटनालाई विभिन्न कोणबाट अनुसन्धान गरिरहेको उनले बताए । सदरमुकाममै भएको घटनाको पाँच महिना लाग्दा पनि दोषि पत्ता नलागेकोमा स्थानीयमा सन्त्रास बढेको छ ।


नवराज पथिक