जिल्ला अस्पतालमा निःशुल्क औषधि सकिँदै

  ०७४ माघ १७ गते

सरकारले सर्वसाधारणका लागि उपलब्ध गराउँदै आएको निःशुल्क औषधि सकिएपछि जिल्ला अस्पताल इलामले अहिले ३० प्रकारका मात्र औषधि उपलब्ध गराउन थालेको छ ।

७० प्रकारका औषधि निःशुल्क दिने भनिएपनि बजेट अभावमा अस्पतालले बिरामीहरूलाई ३० प्रकारका औषधि दिन थालेको जिल्ला अस्पतालकी सूचना अधिकारी रिता अधिकारीले बताइन् ।

जिल्ला अस्पताललाई २५ शैयाबाट स्तरबृद्धि गरेपछि निःशुल्क औषधिमा कटौती भएको अधिकारीको भनाइ छ । अस्पतालको स्तरबृद्धि भएसँगै केन्द्रबाट आउने औषधि आउन छोडेको र गतवर्ष औषधिका लागि छुट्याइएको २८ लाख रुपियाँको औषधि पनि सकिन लागेको अधिकारीले जानकारी दिइन् ।

'पहिला ७० प्रकारका औषधि निःशुल्क दिइन्थ्यो । अस्पताल ५० शैयामा स्तरबृद्धि गरिएपछि केन्द्रबाट औषधि आउँदैन, बजेट पनि आउँदैन ।'-अधिकारीले भनिन्-'जनस्वास्थ्य कार्यालयले पठाइदिएको सिटामोल, जीवनजल, जुकाको जस्ता औषधिमात्र छन् ।'

अधिकारीका अनुसार गतवर्ष२८ लाख रुपियाँमा खरिद गरिएको औषधिले ६ महिना सम्ममात्र धानेको थियो । उच्च रक्तचाप, मधुमेयजस्ता दीर्घ रोगीलाई निःशुल्क दिइने औषधि पनि सक्किएर दिन छाडिएको छ ।

'चालू आर्थिक वर्ष २०७४/०७५ मा नगरपालिकमा नगरक्षेत्रभरिका स्वास्थ्य संस्थालाई उपलब्ध गराउने गरि औषधि खरिदमा ७ लाख रुपियाँ छुटि्टएको कुरा छ । तर, त्यसको औषधि आइपुगेको छैन ।'-अधिकारीले भनिन्-'जिल्ला अस्पतालमा भएको बाँकी ३० प्रकारका औषधिले अब धेरै धाने एक महिनामात्र धान्न सक्छ । त्यो पनि गार्‍हो छ ।' जिल्ला अस्पतालमै निःशुल्क दिइने औषधि नहुँदा औषधि किनेर उपचार गर्न नसक्ने सर्वसाधारण भने प्रत्यक्ष मारमा पर्ने अधिकारीले बताइन् ।


कोकिला ढकाल