जातीय विभेद गरेको आरोपमा उजुरी

  ०७५ वैशाख १३ गते

शैल्यशिखर नगरपालिका-१ बलाँचथलाका २३ वर्षीया रेखा महरले आफूलाई सोही ठाउँका २५ वर्षीय माधवसिंह बोहराले जातीय विभेद गरेको भन्दै जिल्ला प्रहरी कार्यालयमा वैशाख १३ गते उजुरी दिएकी छन् ।

पीडित महिलालाई आरोपितले वैशाख ११ गते जातीय विभेद हने शब्द प्रयोग गरी गालीगलौज गर्नुका साथै कुटपिट गरेको आरोपमा पीडितले प्रहरीमा उजुरी दिएकी हुन् ।

घर नजिकै पानी भर्ने क्रममा पानी भर्न पाइँदैन भन्दै गालीगलौज गरेको पीडितले आरोप लगाइन् । आरोपित बोहराले लाठीले कुटपिट गर्दा चोट लागेको उनले सुनाइन् । पीडितका अनुसार बोहराले अपशब्द बोल्नुका साथै शरीरमा लगाएको कपडा च्यातिदिएका थिए ।

त्यस्तो नगर्न आग्रह गर्दा आरोपितले हसिँया लिएर मार्ने धम्की दिएको पीडितको आरोप छ । कुटपिटको क्रममा पीडितले लगाएको तिलहरी, नथीयासमेत हराएको निवेदनमा उल्लेख गरिएको छ ।

पीडित महिलाले प्रहरी चौकी बलाँच र जिल्ला प्रहरी कार्यालयमा निवेदन दिएकी छन् । पीडितको उपचार वैशाख १३ गते जिल्ला अस्पताल दार्चुलामा गरिएको छ । आरोपितलाई प्रहरीले गिरफ्तार गरेको छैन ।


नरेन्द्रसिह कार्की