जागिरको प्रलोभनमा बलात्कार र लुटपिट घटनाका आरोपित गिरफ्तार

  ०७६ भदौ १७ गते

पाँच जना महिलामाथि बलात्कार, बलात्कार प्रयास र लुटपिट गरेको आरोपमा अग्निसाइर कृष्णासवरन गाउँपालिका-२ सितापुरका २९ वर्षीय सन्तोषकुमार यादवलाई प्रहरीले गिरफ्तार गरी भदौ १६ गते सार्वजनिक गरेको छ ।

रोजगारी डटकममार्फत एनआइसी बैङ्कलगायत विभिन्न गैरसकारी संस्थामा जागिर लगाइदिने भन्दै विराटनगर बोलाइएका महिलाहरूलाई बहाना बनाई सप्तरीको अग्नीसाइर कृष्णसवरणस्थित आफ्नो गाउँ लगेर बलात्कार तथा लुटपिट गरेको आरोपमा यादवलाई गिरफ्तार गरिएको इलाका प्रहरी कार्यालय कञ्चनरुपका डिएसपी मकेन्द्रकुमार मिश्रले बताए ।

डिएसपी मिश्रका अनुसार एक महिलासँग शैक्षिक योग्यताको प्रमाण पत्रहरू लिएर जागिरको प्रलोभन दिइरहेका बेला भदौ १४ गते मोरङको विराटनगर उपमनपा-३ बुढीगङ्गास्थित डेराबाट आरोपित यादवलई गिरफ्तार गरेको हो ।

आरोपित यादवमाथि वैशाख ९ गते ३३ वर्षीया महिलाको मोवाइल र सुनका गरगहना सहित २ लाख १४ हजार रुपियाँ लुटेको, असार २६ गते १९ वर्षीया महिलाको मोवाइल र सुनका गरगहना सहित १ लाख ५६ हजार रुपियाँको धनमाल लुटेको, साउन ८ गते २५ वर्षीया महिलालाई बलात्कार गरी निजको साथमा रहेको मोवाइल र नगद धनमाल लुटेको, भदौ ११ गते २० वर्षीया महिलालाई बलात्कार प्रयास गर्दै नगद, मोवाइल र सुन चाँदीका गरगहना समेत २ लाख रुपियाँ बराबरको धनमाल लुटेको आरोप छ ।

आरोपितले सामाजिक सञ्जाल इमोमा आफूलाई सञ्जिव खड्का भनी चिनाउने गरेका छन् । इमोमार्फत युवतीहरूको मोबाइल नम्बर पत्ता लगाई फोन सम्पर्क गर्ने उनले आफू रोजगारी डटकमको प्रबन्धक रहेको भनेर परिचय दिने गरेका थिए ।

राम्रो जागिर खुलेकोले शैक्षिक योग्यताको प्रमाणपत्र, नागरिकतासहित विराटनगर आएर भेटन पटकपटक अनुरोध गर्ने गरेका आरोपितले दिनभरी अलमल गरी साँझ पार्ने गरेको पीडितहरूको कथन छ ।

साँझ परेपछि विराटनगरको जागिर त छुट्यो अब सप्तरीमा एउटा जागिर बाँकी छ, विराटनगरबाट बिहानै पुग्न नसकिने भएकोले अहिले नै गएर कञ्चनरुपस्थित दिदीको घरमा बसौँ, त्यहाँबाट राजविराज नजिकै पर्छ भनेर आफ्नो गाउँ ल्याई राख्ने गरेका यादवले राती बलात्कार र लुटपिट गर्ने गरेको अनुसन्धानबाट खुलेको डिएसपी मिश्रले बताए ।

मोरङको विराटनगरमा एक महिलामाथि ०७५ फागुन महिनामा भएको लुटपिट र बलात्कार प्रयास गरेको आरोपमा एक वर्ष ६ दिन कैद सजाय पाएका आरोपित फरार अभियुक्त समेत रहेको डिएसपी मिश्रले बताए ।

२५ वर्षीया महिलाले साउन ९ गते इलाका प्रहरी कार्यालय कञ्चनरुपमा दिएको बलात्कार घटनाको उजुरी दर्ता गरी सोही दिन गजेन्द्रनारायण सिंह अस्पताल राजविराजमा पीडितको स्वास्थ्य परीक्षण भएको छ ।

अग्नीसाइर कृष्णसवरण गाउँपालिका-२ स्थित घरमा असार २७ गते र साउन १७ गते तथा विराटनगर उपमनपा-३ स्थित आरोपितको डेरामा भदौ १४ गते छापा मारी पीडितहरूबाट लुटिएको पर्सहरू, सुन र चाँदीको मङ्गलसुत्र, औँठी, लकेटहरू, नगद ३४ हजार रुपियाँ र आठ ओटा मोबाइललगायतका सामग्री बरामद गरेको छ ।


मनोहरकुमार पोखरेल