जनप्रतिनिधिमाथि कुटपिट

  ०७७ जेठ ५ गते

आठविसकोट नगरपालिका वडा नम्बर १० का वडा सदस्य ३२ वर्षीय धनबहादुर कुसारी र वडाध्यक्ष ४३ वर्षीय गंगाराम चनारा माथि ०७७ जेठ ४ गते कुटपिट भएको छ । नगरपालिकामा सामाजिक सुरक्षाको पेस्की फर्छ्यौट गरेर आफुहरु कामको लागि खाद्यान्न कार्यक्रम अन्तरगत काम भैरहेको स्थान बैरीदमार जादै गर्दा बाटोमा कुटपिट भएको वडाध्यक्ष चनाराले जानकारी दिनुभयो ।

कुटपिट गर्नेमा आठविसकोट नगरपालिका वडा नम्बर ९ निवासी २२ वर्षीय ललीत चन्द र आठविसकोट नगरपालिका वडा नम्बर १० निवासी चिरन्जिवी कुसारी रहेका छन् । बिनाकारण लकडाउनको समयमा सरकारी मोटरसाईकल प्रयोग गरेको निहुमा आफुलाई कुटपिट गरेको वडाध्यक्ष चनाराको भनाई छ । कुटपिटबाट सामान्य चोटपटक लागेका अध्यक्ष चनाराले साँझ प्रहरीलाई उजुरी दिने बताउनुभयो ।

हातपात गर्ने दुवै जना फरार रहेको र उनीहरुको खोजी कार्य जारी रहेको जिल्ला प्रहरी कार्यालय रुकुम पश्चिमका प्रमुख डिएसपी ठकबहादुर केसीले जानकारी दिनुभयो । कार्यालयको कामकै सिलसिलामा वडाध्यक्ष र वडा सदस्यमाथि कुटपिट भएको घटनाप्रति गम्भीर ध्यानाकर्षण भएको भन्दै आठविसकोट नगरपालिकाले बिज्ञप्ति निकालेको छ ।


मनिषा केसी