छात्रामैत्री शौचालय नहुँदा बालिकाहरूको पढाइ प्रभावित

  ०७४ वैशाख ४ गते

जिल्लामा सञ्चालित अधिकांश विद्यालयहरूमा छात्रामैत्री शौचालय नहुँदा बालिकाहरूले आफूहरूको पढाइ प्रभावित भएको गुनासो गरेका छन् ।

छात्रामैत्री शौचालय नहुँदा महिनावारी भएका बेला विद्यालय जान नपाएकाले पढाइ प्रभावित भएको बालिकाहरूले गुनासो गरेका हुन् ।

जिल्लाका रहेका ५ सय ४५ विद्यालयहरूमध्ये थोरैमा मात्र छात्रामैत्री शौचालय छन् । तर, तिनीहरू पनि पानीको अभावका कारण अहिले प्रयोगमा आउन नसकेको जिल्ला बाल सञ्जालकी अध्यक्ष सीता भट्टले बताए ।

शैक्षिक सत्र ०७३ को तथ्याङ्क अनुसार जिल्लामा ८२ हजार विद्यार्थी छन्, जसमध्ये ४६ हजार छात्राहरू छन् ।

पछिल्लो समय महिनावारी हुँदा विद्यालय पठाउनु हुँदैन भन्ने रूढीवादी सोचमा केही परिवर्तन आएको भएपनि महिनावारी भएका बेला शौचालयको उपलब्धता नहुने कारण छात्राहरूको उपस्थिति दरसमेत कम भएको जिल्ला शिक्षा कार्यालयका विद्यालय निरीक्षक शङ्करदत्त भट्टको भनाइ छ ।

महिनावारी भएका बेला बढी सरसफाई गर्नुपर्ने र सेनटरी प्याडको समेत आवश्यकता पर्ने भएपनि अहिले बैतडी जिल्लामा पानीको अभावका कारण भएका शौचालयसमेत प्रयोगमा आउन नसक्दा विद्यालयमा अध्यनरत छात्राहरूका साथसाथै आफूहरूसमेत समस्यामा पर्ने गरेको स्थानीय शिक्षिका पार्वती भट्टको भनाइ छ ।

'महिनामा चार दिन अनुपस्थित हुने भएकाले उनीहरूको पढाइमा समेत खस्किँदै छ ।'-विद्यालय निरीक्षक हरी नाथले भने ।

बाल सञ्जाल र बाल क्लबमार्फत सङ्गठित भएका किशोरीहरूले सरोवारवाला निकायसँग (जिल्ला शिक्षा, अन्य सङ्घ संस्था) जिल्लामा रहेका प्रत्येक निमावि, मावि र उच्चमाविहरूमा सेनेटरी प्याडसहित पानीको उपलब्धता भएको छात्रामैत्री शौचालयको माग गरेका छन् ।


नरी बडु