छाउगोठमा एक महिलाको मृत्यु, प्रधानमन्त्रीद्वारा चासो व्यक्त

  ०७३ मङ्सिर ५ गते

तिमिल्सेन-७ की २२ वर्षीया सेतुदेवी उपाध्यायको छाउगोठमा बसेको अवस्थामा मङ्सिर ३ गते राति मृत्यु भएको छ । बेलुकी खाना खाएर छाउगोठमा सुत्न गएकी सेतुदेवी मङ्सिर ४ गते बिहान मृत अवस्थामा फेला परेपनि मृत्युको कारण थाहा हुन नसकेको प्रहरीले जनाएको छ ।

छाउगोठबाट बिहान ढिलोसम्म उठेर नआएपछि परिवारले हेर्न जाँदा पीडित महिलाको नाकबाट रगत आएको अवस्थामा शव फेला परेको स्थानीय तिलक खत्री तिमिल्सेनाले जानकारी दिए ।

घटनाको अनुसन्धान भइरहेको जिल्ला प्रहरी कार्यालयका इन्स्पेक्टर बद्रिप्रसाद ढकालले जानकारी दिए ।

सन् २००७ देखि हालसम्म अछाम जिल्लामा आठ जना महिला तथा किशोरीहरूको छाउगोठमा बस्नु परेकै कारण मृत्यु भएको बताइएको छ ।

महिनावारी भएको बेला अछाम जिल्लाका अधिकाँश महिला तथा किशोरीहरू घरदेखि केही टाढा रहेको सानो कटेरोमा कष्टपूर्ण रूपमा कम्तीमा पाँच दिनसम्म बस्नुपर्ने सामाजिक कुप्रथा कायमै रहेको छ ।

यसैबिच प्रधानमन्त्री पुष्पकमल दाहालले उक्त घटनाप्रति चासो व्यक्त गरेका छन् । प्रधानमन्त्री दाहालको सचिवालयले मङ्सिर ४ गते अछामका प्रमुख जिल्ला अधिकारी कुशलराज शर्मासँग टेलिफोन गरी उक्त घटनाबारे चासो लिएको हो ।

सचिवालयले छाउपडी प्रथाजस्तो कुरीतिको अन्त्यका लागि यथाशीघ्र सरोकारवालाहरूको बैठक बोलाएर जनचेतना अभियान सञ्चालन गर्न निर्देशन दिइएको प्रधानमन्त्रीका स्वकीय उपसचिव मनोहरी तिमल्सिनाले जानकारी दिए ।


शिवराज ढुङ्गाना