चैतमा स्थानीय तहको निर्वाचन हुन सक्दैनः प्रमुख आयुक्त यादव

  ०७३ कात्तिक २० गते

चैत महिनामा स्थानीय तहको निर्वाचन हुन नसक्ने निर्वाचन आयोगका प्रमुख आयुक्त अयोधिप्रसाद यादवले बताएका छन् । निर्वाचन कानुनहरू बन्न नसकेका कारण चैतमा चुनाव गर्ने ढोका बन्द भएको उनले बताएका हुन् ।

प्रमुख निर्वाचन आयुक्त यादवले सरकारलाई चुनावका लागि पठाएका ६ ओटा कानुनहरू मध्ये ३ ओटा कानुन पारित हुन ढिलाइ भएकाले चुनावी अभियानमा अवरोध भएकोले चैत महिनामा स्थानीय निर्वाचन हुन नसक्ने बताएका हुन् ।

जुम्लामा कात्तिक २० गते आयोजना गरिएको अन्तरक्रियामा प्रमुख निर्वाचन आयुक्त यादवले निर्वाचन आयोग ऐन, मतदाता नियमावली ऐनको मस्यौदा संसदमा दर्ता भएपनि पारित हुन ढिलाइ हुँदा निर्वाचन प्रभावित हुने बताए ।

उनले कानुन नबनेसम्म स्थानीय, संसदीय, प्रादेशिक चुनाव हुन नसक्ने भएकाले पहिला कानुन बनाउनु पर्नेमा जोड दिए ।

निर्वाचन आयोगले जुम्लामा आयोजना गरेको निर्वाचन आचारसंहिता सम्बन्धी अन्तरक्रिया कार्यक्रममा आचारसंहिता पालना गर्न जुम्लाका राजनीतिक दल र सरोकारवाला निकायहरूले प्रतिवद्धतासमेत जनाएका छन् । कार्यक्रममा निर्वाचन आचारसंहिता-२०७२ हातमा समातेर उनीहरूले प्रतिवद्धता जनाएका हुन् ।


मानदत्त रावल