चुनावमा धम्की दिएको आरोपमा कम्युनिष्ट पार्टीका दुई जना कार्यकर्ता गिरफ्तार

  ०७४ वैशाख २६ गते

स्थानीय तहको निर्वाचनमा उठेका उम्मेदवारलाई फोनबाट धम्की दिएको आरोपमा प्रहरीले वैशाख २५ गते नेपाल कम्युनिष्ट पार्टीको जिल्ला स्तरका दुई जना नेतालाई गिरफ्तार गरेको छ ।

बागलुङ जिल्लाको पश्चिमी क्षेत्रमा रहेको ढोरपाटन नगरपालिकाबाट नेत्रविक्रम चन्द नेतृत्वको नेपाल कम्युनिष्ट पार्टीका जिल्ला सदस्य हरि कुँवर र वडिगाड गाउँपालिका घर भएका सोही पार्टीका जिल्ला सदस्य नरबहादुर क्षेत्रीलाई गिरफ्तार गरिएको जिल्ला प्रहरी कार्यालयका प्रहरी प्रमुख चन्द्र कुबिर खापुङले जानकारी दिए  ।

खापुङले स्थानीय तहको निर्वाचन नजिकिँदै गर्दा निर्वाचन विरोधी गतिविधि बढेपछि शान्ति सुरक्षा कायम राख्नको लागि उनीहरूलाई गिरफ्तार गरिएको बताए ।

जिल्ला तहका नेतालाई प्रहरीले निर्वाचन बिथोल्न खोजेको बहाना बनाएर गिरफ्तार गरेकोमा आपत्ति जनाउँदै तत्काल रिहाई गर्न माग गरेको सो पार्टीका जिल्ला इञ्चार्ज विकिरण क्षेत्रीले बताए ।

बागलुङमा नेपाल कम्युनिष्ट पार्टीले वैशाख ३१ गते हुने निर्वाचनमा भाग नलिन र निर्वाचनमा उम्मेवार बनेकालाई उम्मेदवारी फिर्ता लिन दबाव दिँदै उम्मेदवारको घरमा कालो झण्डा गाड्नेलगायतका गतिविधि सञ्चालन गरिरहेको छ ।


सृजना पन्त