चार महिना देखि कार्यपालिका बैठक नबस्दा सेवाग्राही मर्कामा

  ०७६ फागुन २९ गते

राइनास नगरपालिकामा चार महिना देखि कार्यपालिकाको बैठक नबस्दा सेवाग्राहीहरु मर्कामा परेका छन् ।

नगरपालिकाका प्रमुख प्रशासकीय अधिकृत रामचन्द्र अधिकारीको सरुवाको माग गर्दै नेपाली काँग्रेस निकट जनप्रतिनिधीले कार्यपालिका बैठक बस्न नदिएको राइनास नपा—४ का वडाध्यक्ष माधव पराजुलीले बताउनुभयो ।

नगरपालिकाबाट हुने सबै सेवाबाट केहि समयको लागि स्थगन गरिएको आन्दोलनकारी जनप्रतिनिधी राइनास नपा—३ का वडाध्यक्ष स्वतन्त्र हमालले बताउनुभयो । प्रमुख प्रशासकीय अधिकृतले राजनैतिक हिसाबले पक्षपात गरेको भनि कार्यपालिका बैठक लगायत नगरपालिकाका नियमित काम बन्द गरिएको हमालले बताउनुभयो ।

राइनास नपा—३ का  ३४ वर्षीय सूर्य पन्थीले छोरा र छोरीको नाबालिका परिचय—पत्रको सिफारिस नपाएको बताउनुभयो । जन्म, मृत्यु र बसाई सराई दर्ता एवं सिफारिस जस्ता नियमित कार्यमा समेत समस्या भएको राइनास नपा—३ का ३५ वर्षीय बाबुराम अधिकारीले बताउनुभयो ।

बैठक संचालन नहुँदा स्थानीय ऐन कानून बनाउन नपाएको नगरप्रमुख सिंहबहादुर थापाले बताउनुभयो । आन्दोलनका कारणले नेपाली नागरिकताको सिफारिस समेत प्रभावित भएको राइनास नपा—५ का ३६ वर्षीय राजु उपरकोटीले बताउनुभयो ।

राजनैतिक खिचातानीले गर्दा सेवाग्राहीले सेवा लिन नपाउनु मानवअधिकार उल्लघंन भएको उपरकोटीको भनाइ छ । नगरउप्रमुख धनकुमारी गुरुङका अनुसार कर्मचारीको पक्षपात कार्यले जनप्रतिनिधी आन्दोलित हुनुपरेको बताउनुभयो ।

नगरप्रमुख सिंहबहादुर थापाका अनुसार एक हप्ता भित्रै सहमती गरि नगरपालिकाको नियमित कार्य सुचारु हुने प्रतिबद्धता व्यक्त गर्नुभएको छ ।


दलबहादुर मजाकोटी